सेयरबजार सामान्य अंकले बढ्यो, कारोबार रकममा केही सुधार

काठमाण्डौ । बिहिबारको कारोबारमा सेयरबजार सामान्य अंकले बढेको छ । आज नेपाल स्टक एक्सचेञ्ज (नेप्से) परिसूचक ०.३३ प्रतिशत अर्थात ८.८१ अंकले बढेर २ हजार ६५१.२१ विन्दुमा पुगेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.२१ प्रतिशतले बढेर ४६४.५९ विन्दुमा पुगेको छ ।

आज नेप्सेमा सूचीकृत ३४७ वटा स्क्रिप्टको १  करोड २ लाख २४ हजार १९ कित्ता सेयर किनबेच हुँदा कुल कारोबार रकम ३ अर्ब ७२ करोड ३३ लाख बढीको सेयर कारोबार भएको छ । अघिल्लो दिन भने ३ अर्ब ५३ करोड २१ लाख बढीको सेयर कारोबार भएको थियो ।

आजको बजारबारे बजार जानकार सरोज भट्टराई भन्छन्, ‘अहिलेको बजार साइडवेजमै छ । २२ सयको लोअर विन्दु ब्रेक आउट गरेर नेप्से सूचक अहिले २९ सयको हाई विन्दु र २६ सयको विन्दुबीच रुमलिएको छ । अहिलेको मार्केटमा टर्नओभर हेर्दा तत्कालै बजारले गति लिने अवस्था देखिदैन । बजार बढ्नुपर्ने मुख्य सिजनमै माथि जान नसकेपछि अब बजार यो लेभलभन्दा माथि पुग्ने सम्भावना रहँदैन । विगतमा बर्षहरुमा यो सिजनमा ‘अल टाइम हाई’ रेडर्क कायम भएको थियो । यो वर्ष सेयर लगानीकर्ताहरुमा कन्फिडेन्ट लेभल नै नभएकाले बजारको गति दौडिन सकेको छैन ।’

उनले थपे, ‘बजारमा अहिले ‘स्मार्ट मनि’को निर्क अभाव छ । अब विस्तारै बजार बढ्नुपर्ने सिजन पनि सकिँदैछ, चाडपर्व नजिकिदै गएको छ । व्यापारीहरु अब सेयरबजार भन्दा आ–आफ्नो व्यापारमा केन्द्रित हुन्छन् । अन्य लगानीकर्ता पनि ग्याजेट र घरजग्गा कारोबारतिर सिफ्ट हुने देखिन्छ । केही गरी बीचमा सरकारले नयाँ कुरा ल्यायो भने थोरै बढ्ला नत्र बजार माथि उकासिने छाँटकाँट देखिदैन ।’

कुन समूहमा भयो कतिको थपघट ?

आज कारोबारमा आएका १३ वटै समूहमध्ये ३ वटा बाहेक अन्य सबैमा हरियाली छायो । आज एतपादन तथा प्रशोधन समूह सर्वाधिक अर्थात ०.५७ प्रतिशतले बढ्यो । यस्तै बैंकिङ समूह ०.३९ प्रतिशत, विकास बैंक ०.५३, फाइनान्स ०.०१, होटल ०.३५, हाईड्रो ०.५६, जीवन बीमा ०.२०, लघुवित्त ०.२२, निर्जीवन बीमा ०.५२ र अन्य समूह ०.२८ प्रतिशतले बढ्यो ।  ।

आज लगानी र म्युचुअल फण्ड समूह मात्रै घटे । यी समूहहरु आज ०.४९ र ०.२२ प्रतिशतले घटे । व्यापार समूह आज अपरिवर्तित रह्यो ।

सर्वाधिक कारोबार हुने कम्पनी

आज घलेम्दी हाईड्रोको सर्वाधिक सेयर कारोबार भयो । यो कम्पनीको आज २९ करोड ९८ लाख बढीको सेयर कारोबार भयो । यस्तै एनआरएन इन्फ्रास्ट्रक्चरको १६ करोड ६९ लाल, सोलु हाईड्रोको १५ करोड ७० लाख, सेन्ट्रल फाइनान्सको १२ करोड २२ लाख र युनाइटेड मोदी हाईड्रोको १५ करोड ५९ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरु मध्ये दुईवटा कम्पनीको सेयरमूल्यमा मात्रै अपर सर्किट लाग्यो । आज सवोत्तम पेन्ट्स र माउण्ट एभरेष्ट पावरको सेयरमूल्यमा मात्रै अपर सर्किट लाग्यो ।

यस्तै आज सुपरखुदी हाईड्रोको सेयरमूल्य १३.०२ प्रतिशत, घलेम्दी हाईड्रोको ११.९० र सिवाईसी नेपाल लघुवित्तको सेयरमूल्य ५.०९ प्रतिशतले बढ्यो ।  

यो दिन प्रभु बैंक डिबेञ्चर २०८६ को मूल्य सर्वाधिक अर्थात १०.४५ प्रतिशतले घट्यो ।