अमेरिकाले ४७ वर्षपछि सिरियालाई ‘आतंकवाद प्रायोजन गर्ने राष्ट्र’को सूचीबाट हटायो

विश्व अर्थतन्त्र
मंगलवार, भाद्र ९,२०८३ 13:41:03

काठमाण्डौ । अमेरिकाले सिरियालाई करिब ४७ वर्षपछि ‘आतंकवाद प्रायोजन गर्ने राष्ट्र’को सूचीबाट हटाएको छ। अमेरिकी प्रशासनका अनुसार यो निर्णयको मुख्य उद्देश्य सिरियामा विदेशी लगानीको वातावरण सहज बनाउनु र सिरियालाई विश्व अर्थतन्त्रसँग पुनः जोड्नु हो।

सिरिया सूचीबाट हटेसँगै अमेरिकाको उक्त सूचीमा अब इरान, उत्तर कोरिया र क्युबा गरी तीन देश मात्र बाँकी रहेका छन्।

अमेरिकी विदेशमन्त्री मार्को रुबियोले यो निर्णयले सिरियालाई आर्थिक समृद्धितर्फ अघि बढ्ने अवसर प्रदान गर्ने बताएका छन्। सिरियालाई सूचीबाट हटाउने प्रस्ताव पहिलोपटक गत वर्ष जुलाईमा अघि सारिएको थियो।

अमेरिकी अर्थमन्त्री स्कट बेसन्टले पनि निर्णयको स्वागत गर्दै यसबाट सिरियामा थप विदेशी लगानी भित्र्याउन सहयोग पुग्ने र त्यसले देशको राजनीतिक तथा आर्थिक स्थिरता बलियो बनाउन योगदान गर्ने बताएका छन्।

पछिल्लो समय अमेरिकी राष्ट्रपति डोनाल्ड ट्रम्प नेतृत्वको प्रशासनले सिरियाका नयाँ राष्ट्रपति अहमद अल–शरासँग सम्पर्क र संवाद बढाउँदै आएको छ।

अल–शरा विगतमा एक सशस्त्र संगठनका नेता थिए र उनी अल–कायदासँग सम्बन्धित संगठनको नेतृत्वसमेत गरिसकेका थिए। कुनै समय अमेरिकाले उनको खोजीका लागि पुरस्कारसमेत घोषणा गरेको थियो।

यसअघि गत वर्ष अमेरिकाले अल–शराको नेतृत्वमा रहेको इस्लामिक संगठन हयात तहरीर अल–शाम ९ज्त्क्० लाई आफ्नो आतंकवादी संगठनको सूचीबाट हटाएको थियो।

सिरियालाई ‘आतंकवाद प्रायोजन गर्ने राष्ट्र’को सूचीबाट हटाउने पछिल्लो निर्णयले अमेरिकी–सिरियाली सम्बन्धमा नयाँ चरणको सुरुवातसँगै सिरियाको आर्थिक पुनर्निर्माण र विदेशी लगानीका लागि थप अवसर सिर्जना गर्ने अपेक्षा गरिएको छ।