सेयरबजार लगातार दोस्रो दिन पनि बढ्यो, ‘बजार बटममा पुग्दा ट्रेडरले बढाए खरिद’

Capital Market
बुधबार, भाद्र १७,२०८३ 15:22:18

काठमाण्डौ । बुधबारको कारोबारमा पनि सेयरबजार वृद्धि भएको छ । आज नेपाल स्टक एक्सचेञ्ज (नेप्से) परिसूचक ०.६१ प्रतिशत अर्थात १५.४४ अंकले बढेर २ हजार ५३८.११ विन्दुमा पुगेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.६७ प्रतिशतले बढेर ४४९.१८ विन्दुमा पुगेको छ ।

आज नेप्सेमा सूचीकृत ३५४ वटा स्क्रिप्टको ७२ लाख ६८ हजार २०२ कित्ता सेयर किनबेच हुँदा कुल कारोबार रकम २ अर्ब ९४ करोड २७ लाख बढीको सेयर कारोबार भएको छ । अघिल्लो दिन भने २ अर्ब ९० करोड बढीको सेयर कारोबार भएको थियो ।

आजको बजारबारे बजार जानकार सरोज भट्टराई भन्छन्, ‘सेयरबजारलाई अस्तिको बाढीले प्रभाव पारेको थियो । तर समग्रमा हेर्दा पछिल्लो समयको बजारलाई एउटा फ्याक्टरले प्रभाव पारिरहेको छ । बजार साइडवेजमा रहेर ‘बटम जोन’मा पुगिसकेको थियो । मार्केटमा यतिबेला ट्रेडरहरु मात्रै सक्रिय छन् । ‘स्विङ ट्रेडर’ ले नेप्से तल्लो विन्दुमा आउँदा सेयर किनेको देखिन्छ, जसकारण हिजो र आज सेयरबजारमा हरियो देखिएको छ ।’

उनले थपे, ‘अब यहि अवस्था हेरेरै बजार अब के हुन्छ भन्न सकिँदैन । लाभांशको सिजन पनि भएकाले पूँजीकरणको हिस्सा ठूलो भएका कम्पनीले राम्रै लाभांश दिंदा नेप्से सूचकमा समेत प्रभाव पारेको देखिएको छ । जस्तै आज ग्लोबल आइएमईले लाभांश घोषणा गर्दा समग्र बजार थोरै पोजेटिभ देखिएको छ । यसबाहेक बजार घटेर बटम जोनमा पुगेकाले ट्रेडरहरुले सेयर उठाएको पनि बुझ्न सकिन्छ ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये दुईवटा बाहेक अन्य सबैमा हरियाली छायो। आज हाईड्रो समूह सर्वाधिक अर्थात ०.९५ प्रतिशतले बढ्यो ।

यस्तै बैंकिङ समूह ०.७३ प्रतिशत, विकास बैंक ०.५९, फाइनान्स ०.९१, होटल ०.१८, लगानी ०.४१, जीवन बीमा ०.०९, लघुवित्त ०.४३, अन्य ०.८० र व्यापार ०.७२ प्रतिशतले बढे।

आज म्युचुअल फण्ड र निर्जीवन बीमा समूह मात्रै घटे । यी समूहहरु क्रमशः ०.०९ र ०.०७ प्रतिशतले घटे ।

सर्वाधिक कारोबार हुने कम्पनी

आज सानिमा मिडिल तमोरको सर्वाधिक सेयर कारोबार भयो । यो कम्पनीको आज १४ करोड १७ लाख बढीको सेयर कारोबार भयो । यस्तै एनआरएन इन्फ्रास्ट्रक्चरको १२ करोड ६४ लाख, सोलु हाईड्रोको १२ करोड १४ लाख र शिवम् सिमेन्टको १० करोड ८९ लाख बढीको सेयर कारोबार भयो।

सर्वाधिक कमाउने र गुमाउने कम्पनी

आज कारोबारमा आएका कम्पनीहरु मध्ये कुनैपनि कम्पनीको सेयरमूल्यमा अपर सर्किट लागेन । आज उपकार लघुवित्तको सेयरमूल्य सर्वाधिक अर्थात ११.८७ प्रतिशतले बढ्यो ।

यस्तै माथिल्लो मैलुङखोला जलविद्युतको १०.२३ प्रतिशत, आत्मनिर्भर लघुवित्तको १०.१० र सेन्ट्रल फाइनान्सको सेयरमूल्य ९.११ प्रतिशतले बढ्यो ।

यो दिन एनएमबी इनर्जी बोण्डको मूल्य सर्वाधिक अर्थात ५.८१ प्रतिशतले घट्यो ।