सेयरबजार ०.५४% ले घट्यो, जानकार भन्छन्, ‘बजार बढ्न नीतिगत सुधार आवश्यक’

Capital Market
बिहीबार, भाद्र २५,२०८३ 15:19:34

काठमाण्डौ । सेयरबजार आजपनि घटेको छ । आज नेपाल स्टक एक्सचेञ्ज (नेप्से) परिसूचक ०.५४ प्रतिशत अर्थात १३.८५ अंकले घटेर २ हजार ५३१.५५ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.५३ प्रतिशतले घटेर ४४९.९३ विन्दुमा झरेको छ ।

आज नेप्सेमा सूचीकृत ३४१ वटा स्क्रिप्टको १ करोड ५ लाख ८८ हजार ६५३ कित्ता सेयर किनबेच हुँदा कुल कारोबार रकम ४ अर्ब ९ लाख बढीको सेयर कारोबार भएको छ । अघिल्लो कारोबारमा भने ४ अर्ब १९ करोड बढीको सेयर कारोबार भएको थियो ।

आजको बजारबारे बजार जानकार खोमनाथ प्याकुरेल भन्छन्, ‘अहिले बजारमा खासै नयाँ कुरा केही आएको छैन । बजार बढ्नका लागि खासै माहोल बनेको छैन । समग्रमा हेर्दा बजार बढ्नका लागि पोजेटिभ सेन्टिमेन्ट देखिदैन । केही दिनअघि अर्थमन्त्रीले सेबोन अध्यक्ष र गर्भनरसँग पूँजीबजार सुधारका लागि सुझावहरु मागिएको कुरा पनि सत्य हो वा होइन अन्योल छ । यस्तै खालका अन्योलताले बजार जसोतसो चलिरहेको छ । आज अन्तिम समयसम्ममा उद्योगमन्त्रीको राजिनामाले पनि बजारलाई केही इफेक्ट गरेको हुनसक्छ ।’

ेउनले थपे, ‘साथै आजको बजार घट्नुको मुख्य कारण रिलायन्स स्पिनिङ मिल्सको दबदबा कायम रहनु पनि हो । समग्रमा बजारको अवस्था तत्कालै सुधार हुने देखिदैन । सरकारले केही पोजेटिभ कुरा ल्यायो भने ३–४ सय अंकले बढ्न सक्ला तर त्यसको लागि लगानीकर्तामा कन्फिडेन्ट पनि देखिनुपर्दछ । लगानीकर्ताको मनोबल उच्च बनाउन नीतिगत सुधार आवश्यक छ । सम्बन्धित निकायले मुख्यगरी अहिले संस्थापक र पब्लिक सेयरको नीतिगत व्यवस्था सुधार्न जरुरी छ ।’

कुन समूहमा भयो कतिको थपघट ?

आज कारोबारमा आएका १३ वटै समूहमा रातो पोतियो । आज उत्पादन तथा प्रशोधन समूह सर्वाधिक अर्थात १.१४ प्रतिशतले घट्यो । यस्तै बैंकिङ समूह ०.४७, विकास बैंक ०.३४ प्रतिशत, फाइनान्स ०.६६, होटल ०.५०, हाईड्रो ०.५५, लगानी ०.४१, जीवन बीमा ०.१७, लघुवित्त ०.५६, म्युचुअल फण्ड ०.५७, निर्जीवन बीमा ०.७८, अन्य ०.६४ र व्यापार ०.२७ प्रतिशतले घट्यो ।

सर्वाधिक कारोबार हुने कम्पनी

आज लिबर्टी इनर्जीको सर्वाधिक सेयर कारोबार भयो । यो कम्पनीको आज ४५ करोड ४८ लाख बढीको सेयर कारोबार भयो । यस्तै रिलायान्स स्पीनिङ मिल्सको २१ करोड १२ लाख, एनआरएन इन्फ्रास्ट्रक्चरको १९ करोड ११ लाख र नेपाल एसबीआई बैंकको १६ करोड ७९ लाख बढीको सेयर कारोबार भयो।

सर्वाधिक कमाउने र गुमाउने कम्पनी

आज कारोबारमा आएका कम्पनीहरु मध्ये एउटा मात्रै कम्पनीको सेयरमूल्यमा अपर सर्किट लाग्यो । आज लिबर्टी इनर्जीको सेयरमूल्यमा मात्रै अपर सर्किट लाग्यो ।

यस्तै दोल्ती पावरको सेयरमूल्य ८.२२ प्रतिशत, अपर लोहरे खोला हाईड्रोको ७.०२ र इमर्जिङ नेपालको सेयरमूल्य ५.४६ प्रतिशतले बढ्यो ।

यो दिन सिन्धु विकास बैंकको सेयरमूल्य सर्वाधिक अर्थात १४.९८ प्रतिशतले घट्यो । यस्तै प्रभु सेलेक्ट फण्डको मूल्य १०.२२ प्रतिशत, प्रभु स्मार्ट फण्डको ९.३० र कर्पोरेट डेभलपमेन्ट बैंकको सेयरमूल्य ५.२४ प्रतिशतले घट्यो ।