ओपेक सदस्य राष्ट्रहरुको तेल उत्पादन घट्यो, सेप्टेम्बरमा भने बढाउने तयारी

विश्व अर्थतन्त्र
बिहीबार, भाद्र २५,२०८३ 18:09:15

काठमाण्डौ । ओपेक सदस्य राष्ट्रहरूले उत्पादन क्रमशः बढाउने ओपेक प्लसको योजनाबीच पनि अगस्टमा कच्चा तेलको उत्पादन घटाएका छन्। मध्यपूर्वमा जारी युद्धका कारण आपूर्ति तथा निर्यातमा आएको अवरोधले उत्पादनमा असर पारेको हो।

रोयटर्सको सर्वेक्षणअनुसार ओपेकका ११ सदस्य राष्ट्रले अगस्टमा औसत प्रतिदिन १ करोड ९७ लाख १० हजार ब्यारेल तेल उत्पादन गरेका छन्। यो जुलाईको तुलनामा प्रतिदिन ६ लाख ४० हजार ब्यारेल कम हो।

विशेषगरी साउदी अरबको तेल निर्यातमा देखिएको समस्या तथा अमेरिकी नाकाबन्दीका कारण इरानको अन्तर्राष्ट्रिय बजारमा तेल आपूर्ति गर्ने क्षमतामा आएको सीमितताले उत्पादन तथा आपूर्तिमा प्रभाव पारेको जनाइएको छ।

ओपेक प्लसका सात प्रमुख सदस्य राष्ट्रले अगस्टमा तेल उत्पादन बढाउने योजना बनाएका थिए। तर, निर्यातमा देखिएको अवरोधका कारण वास्तविक उत्पादन लक्ष्यभन्दा कम भएको रोयटर्सले जनाएको छ।

यसैबीच, ओपेकको संस्थापक सदस्य भेनेजुएलाले संगठनबाट बाहिरिने सम्भावनाबारे गम्भीरतापूर्वक विचार गरिरहेको बताइएको छ। भेनेजुएलाले ६ दशकभन्दा बढीअघि ओपेक स्थापना गर्न महत्वपूर्ण भूमिका खेलेको थियो।

भेनेजुएलाले ओपेकबाट बाहिरिने विषयमा अमेरिकी अधिकारीहरूसँग समेत छलफल गरेको छ। यद्यपि, यसबारे हालसम्म कुनै अन्तिम निर्णय भने भएको छैन।

यसैबीच, ओपेक प्लसका सात देशले सेप्टेम्बर २०२६ मा प्रतिदिन १ लाख ८८ हजार ब्यारेलले उत्पादन लक्ष्य बढाउने सहमति गरेका छन्। उत्पादन बढाउने योजनाबीच निर्यात अवरोध तथा भू–राजनीतिक तनावले विश्व तेल बजारमा आपूर्तिको अवस्था भने अझै अनिश्चित बनाएको छ।