हाथवे इन्भेष्टमेन्टका दुई आधारभूत सेयरधनीले ६.८५ लाख कित्ता सेयर बिक्री गर्ने

 

काठमाडौं। हाथवे इन्भेष्टमेन्ट नेपाल लिमिटेडका दुई आधारभूत सेयरधनीले कुल ६ लाख ८५ हजार ७२७ कित्ता सेयर बिक्री गर्ने मनसाय देखाएका छन्।

कम्पनीले नेपाल स्टक एक्सचेञ्ज (नेप्से)लाई पठाएको जानकारीअनुसार आधारभूत सेयरधनी सुमित प्रधान र मनिष ढकालले आफूले धारण गरेको सेयर आगामी तीन महिनाभित्र बिक्री गर्ने मनसायसहित कम्पनीमा निवेदन दिएका हुन्। कम्पनीले उक्त निवेदन असोज २ गते प्राप्त भएको जनाएको छ।

कम्पनीको विवरणअनुसार सुमित प्रधानले ३ लाख ४८ हजार ६६६ कित्ता र मनिष ढकालले ३ लाख ३७ हजार ६१ कित्ता सेयर बिक्री गर्ने मनसाय जनाएका छन्। यसअनुसार दुई सेयरधनीले बिक्री गर्न चाहेको सेयरको कुल संख्या ६ लाख ८५ हजार ७२७ कित्ता हुन्छ।

नेपाल धितोपत्र बोर्डले आधारभूत सेयरधनीले आफूले धारण गरेको सेयरको ५ प्रतिशत वा सोभन्दा बढी सेयर बिक्री गर्नुपूर्व कम्तीमा १५ दिनअघि जानकारी गराउनुपर्ने व्यवस्था गरेको छ। सोही व्यवस्थाअनुसार दुवै सेयरधनीले बिक्रीको मनसायबारे पूर्वजानकारी गराएका हुन्।

कम्पनीले असोज ५ गते नेप्सेलाई पठाएको पत्रको बोधार्थ नेपाल धितोपत्र बोर्ड, सीडीएस एण्ड क्लियरिङ र ग्लोबल आईएमई क्यापिटललाई समेत दिएको छ।