पोलिसी सरेण्डर संख्या घट्दा पनि रकम बढ्यो, दुई महिनामै बाहिरियो रु.२.५७ अर्ब

काठमाण्डौ । जीवन बीमा पोलिसी बीचमै त्याग्ने अर्थात् सरेण्डर गर्ने बीमितको संख्या घटे पनि त्यसबापत बीमा कम्पनीबाट बाहिरिने रकम भने बढेको छ।

नेपाल बीमा प्राधिकरणका अनुसार चालु आर्थिक वर्ष २०८३/८४ को भदौ मसान्तसम्म १४ हजार ९९६ वटा जीवन बीमालेख सरेण्डर भएका छन्। गत आर्थिक वर्षको सोही अवधिमा १५ हजार ८६८ वटा पोलिसी सरेण्डर भएका थिए। यस आधारमा सरेण्डर हुने पोलिसीको संख्या ५.६७ प्रतिशत घटेको छ।

तर, संख्या घट्दा पनि सरेण्डर रकम भने बढेर २ अर्ब ५७ करोड ४३ लाख रुपैयाँ पुगेको छ। गत वर्षको भदौसम्म यस्तो रकम करिब २ अर्ब ५० करोड ७ लाख रुपैयाँ थियो।

अर्थात् एक वर्षको अवधिमा सरेण्डर संख्या ८७२ वटाले घट्दा पनि त्यसबापत बाहिरिएको रकम भने करिब ७ करोड ३६ लाख रुपैयाँले बढेको छ। रकमका आधारमा सरेण्डर भुक्तानी २.९४ प्रतिशतले बढेको हो।

यसले कम संख्यामा पोलिसी सरेण्डर भए पनि तुलनात्मक रूपमा ठूला बीमांक वा बढी मूल्यका पोलिसी त्यागिने क्रम बढेको संकेत गर्छ।

तथ्यांकअनुसार गत वर्ष भदौसम्म एउटा सरेण्डर पोलिसीमा औसत करिब १ लाख ५८ हजार रुपैयाँ भुक्तानी भएकोमा यस वर्ष यस्तो औसत बढेर करिब १ लाख ७२ हजार रुपैयाँ पुगेको छ। औसत सरेण्डर रकम झण्डै ९ प्रतिशतले बढेको देखिन्छ।

जीवन बीमा क्षेत्रमा पोलिसी सरेण्डरलाई महत्वपूर्ण सूचकका रूपमा हेरिन्छ। बीमितले निश्चित अवधि प्रिमियम तिरेपछि विभिन्न कारणले पोलिसी बीचमै बन्द गरेर तोकिएको रकम फिर्ता लिने प्रक्रियालाई सरेण्डर भनिन्छ। यस्तो प्रवृत्ति बढ्दा बीमा कम्पनीको दीर्घकालीन कोष व्यवस्थापन, निरन्तर प्रिमियम आम्दानी र व्यवसायको गुणस्तरमा समेत असर पर्न सक्छ।

यसैबीच, भदौ मसान्तसम्म १० लाख १० हजार ९९६ वटा बीमालेख व्यतित भएका छन्। गत वर्ष सोही अवधिमा व्यतित बीमालेखको संख्या १२ लाख १३ हजार ५६२ थियो। यस आधारमा व्यतित बीमालेखको संख्या १६.६९ प्रतिशत घटेको छ।

व्यतित बीमालेखको रकम पनि गत वर्षको करिब ३६ अर्ब ४३ करोड रुपैयाँबाट घटेर ३५ अर्ब ५९ करोड रुपैयाँ हाराहारीमा आएको छ।

समग्र तथ्यांकले बीमालेख व्यतित हुने र सरेण्डर हुने संख्या घटेको देखाए पनि सरेण्डर रकम बढ्नु भने जीवन बीमा व्यवसायका लागि चासोको विषय बनेको छ। खासगरी कम पोलिसी सरेण्डर हुँदा पनि बढी रकम बाहिरिनुले ठूला पोलिसी बीचमै छाड्ने प्रवृत्तितर्फ संकेत गरेको देखिन्छ।