सेयर कारोबार ५३ प्रतिशतले खस्कियो, दुई महिनामा १ खर्ब ८१ अर्बमा सीमित

काठमाण्डौ । चालु आर्थिक वर्ष २०८३/८४ को पहिलो दुई महिनामा धितोपत्र बजारको कारोबार रकम अघिल्लो आर्थिक वर्षको सोही अवधिको तुलनामा आधाभन्दा बढी घटेको छ।

मध्य जुलाईदेखि मध्य सेप्टेम्बरसम्मको तथ्यांकअनुसार चालु आर्थिक वर्षमा कुल १ खर्ब ८१ अर्ब ४५ करोड २७ लाख रुपैयाँबराबरको धितोपत्र कारोबार भएको छ। अघिल्लो आर्थिक वर्ष २०८२/८३ को सोही अवधिमा यस्तो कारोबार ३ खर्ब ८६ अर्ब ७४ करोड २१ लाख रुपैयाँ थियो।

यस आधारमा एक वर्षमै कुल कारोबार रकम करिब ५३.१ प्रतिशतले घटेको देखिन्छ।

कारोबार रकमका आधारमा यस वर्ष पनि जलविद्युत् समूह सबैभन्दा अगाडि छ। पहिलो दुई महिनामा जलविद्युत् कम्पनीहरूको ८६ अर्ब ६ करोड १२ लाख रुपैयाँबराबरको कारोबार भएको छ। यद्यपि अघिल्लो वर्षको १ खर्ब ४० अर्ब २ करोड ५९ लाख रुपैयाँको तुलनामा जलविद्युत् समूहको कारोबार करिब ३८.५ प्रतिशत घटेको हो।

उत्पादन तथा प्रशोधन समूहमा २३ अर्ब ५१ करोड रुपैयाँको कारोबार भएको छ। अघिल्लो वर्ष यही अवधिमा २९ अर्ब ७९ करोड ८८ लाख रुपैयाँ कारोबार भएको थियो।

वाणिज्य बैंकहरूको कारोबार पनि उल्लेख्य घटेको छ। अघिल्लो वर्ष ३७ अर्ब ८८ करोड ४५ लाख रुपैयाँ कारोबार भएकोमा चालु वर्षको पहिलो दुई महिनामा २० अर्ब २० करोड ११ लाख रुपैयाँमा सीमित भएको छ।

सबैभन्दा ठूलो गिरावटमध्ये लघुवित्त समूह पनि परेको छ। लघुवित्तको कारोबार ३६ अर्ब ७१ करोड ७१ लाख रुपैयाँबाट घटेर ६ अर्ब १८ करोड ७५ लाख रुपैयाँमा झरेको छ। यो करिब ८३ प्रतिशतको गिरावट हो।

त्यस्तै, विकास बैंकको कारोबार ३४ अर्ब ४८ करोड रुपैयाँबाट घटेर १० अर्ब ६८ करोड रुपैयाँ, जीवन बीमाको १२ अर्ब ९५ करोड रुपैयाँबाट ३ अर्ब ५७ करोड रुपैयाँ र निर्जीवन बीमाको ८ अर्ब ९ करोड रुपैयाँबाट २ अर्ब ३३ करोड रुपैयाँमा झरेको छ।

लगानी समूहको कारोबार पनि २० अर्ब २५ करोड रुपैयाँबाट घटेर ८ अर्ब २९ करोड रुपैयाँमा सीमित भएको छ।

अर्कोतर्फ अधिकांश समूहको कारोबार घट्दा ऋणपत्र कारोबार भने उल्लेख्य बढेको छ। अघिल्लो वर्ष पहिलो दुई महिनामा ३२ करोड ६५ लाख रुपैयाँबराबर ऋणपत्र कारोबार भएकोमा यस वर्ष बढेर २ अर्ब ५१ करोड २८ लाख रुपैयाँ पुगेको छ। यो करिब ६७० प्रतिशतको वृद्धि हो।

समग्र तथ्यांकले चालु आर्थिक वर्षको सुरुआती दुई महिनामा दोस्रो बजारमा लगानीकर्ताको सक्रियता अघिल्लो वर्षको तुलनामा उल्लेख्य रूपमा कमजोर बनेको देखाएको छ।