नानो फर्टिलाइजर र जैविक मललाई आवश्यक पदार्थको सूचीमा राख्ने सरकारको निर्णय

काठमाण्डौ ।  सरकारले नानो फर्टिलाइजर, बायोस्टिमुलेन्ट तथा व्यावसायिक रूपमा उत्पादन र बिक्री–वितरण हुने जैविक एवं प्राङ्गारिक मललाई आवश्यक पदार्थको सूचीमा समावेश गर्ने निर्णय गरेको छ ।

सरकारले यस्ता मलको उत्पादन, गुणस्तर तथा बिक्री–वितरणलाई व्यवस्थित र नियमन गर्ने उद्देश्यले ‘मल नियन्त्रण आदेश, २०८३’ स्वीकृत गर्ने निर्णयसमेत गरेको छ ।

सरकारको निर्णयअनुसार नानो फर्टिलाइजर, बायोस्टिमुलेन्ट तथा व्यावसायिक रूपमा उत्पादन र बिक्री–वितरण हुने जैविक तथा प्राङ्गारिक मललाई आवश्यक पदार्थको सूचीमा समावेश गरिनेछ ।

यससम्बन्धी सूचना नेपाल राजपत्रमा प्रकाशन गरिने सरकारको निर्णयमा उल्लेख छ ।

मल नियन्त्रण आदेश कार्यान्वयनमा आएपछि नानो फर्टिलाइजर तथा वैकल्पिक प्रकृतिका मलको उत्पादन, गुणस्तर, बिक्री–वितरण र बजार व्यवस्थापनलाई स्पष्ट नियामकीय दायरामा ल्याउने बाटो खुल्नेछ ।

पछिल्लो समय रासायनिक मलसँगै जैविक, प्राङ्गारिक, नानो तथा बायोस्टिमुलेन्टको प्रयोग र व्यावसायिक कारोबार बढिरहेका बेला सरकारले यी वस्तुलाई औपचारिक नियमनको दायरामा ल्याउने निर्णय गरेको हो ।