काठमाडौं । युक्रेनका राष्ट्रपति भोलोदिमिर जेलेन्स्कीले अमेरिकी सरकार र एलन मस्कसँग युक्रेनको सुरक्षा सुनिश्चित गर्न आग्रह गरेका छन्। उनले अमेरिकाले उपलब्ध गराउँदै आएको सैन्य प्रयोजनको स्याटेलाइट इन्टरनेट सेवा स्टारसिल्ड अझै सुस्त गतिमा सञ्चालन भइरहेकाले रुसी आक्रमण रोक्न कठिनाइ भइरहेको बताएका छन्।
आइतबार उनले जाडोयाम सुरु हुनुअघि सर्वसाधारणको ज्यान र युक्रेनको ऊर्जा पूर्वाधार जोगाउन उक्त सेवामाथिका प्रतिबन्ध हटाउनुपर्ने बताए।
जेलेन्स्कीले अमेरिकी सरकार र मस्कको कम्पनीसँग नजिकबाट समन्वय गर्न अधिकारीहरूलाई निर्देशन दिएको जानकारी दिए। उनले इतिहासको सही पक्षमा उभिनु महत्त्वपूर्ण रहेको पनि बताए।
मस्कको कम्पनीले सञ्चालन गर्ने स्टारलिंकको सैन्य प्रयोजनका लागि तयार गरिएको सेवा स्टारसिल्डको गति सीमित गरिएको विषय केही सातादेखि चर्चामा छ। युक्रेनले युद्धमैदानमा सञ्चारका लागि सामान्य स्टारलिंक सेवा प्रयोग गर्दै आएको छ भने आफ्नो हवाई क्षेत्रमा क्षेप्यास्त्र र ड्रोन रोक्न स्टारसिल्डको प्रयोग गर्छ।
सेवाको गति सीमित गरिएको विषय पहिलोपटक अक्टोबरमा सार्वजनिक भएको थियो। त्यसपछि मस्क र अमेरिकी राष्ट्रपति डोनाल्ड ट्रम्पका भनाइमा विरोधाभास देखिएको थियो। मस्कले स्टारसिल्ड अमेरिकी सरकारको नियन्त्रणमा रहेकाले यसको जिम्मेवारी पनि सरकारकै हुने बताएका थिए। तर, ट्रम्पले उक्त दाबी अस्वीकार गर्दै मस्कलाई सेवा पहिलेझैँ सञ्चालन गर्न आग्रह गरेको बताएका थिए।


प्रतिक्रिया
0 प्रतिक्रियाअहिलेसम्म कुनै प्रतिक्रिया छैन। पहिलो प्रतिक्रिया तपाईंको हुन सक्छ।