साढे २ घण्टामा झण्डै १३ अर्बको कारोबार, अघिल्लो दिनको रेकर्ड ब्रेक होला ?

STOCK MARKET
बिहीबार, श्रावण १७,२०८१ 13:31:37

काठमाण्डौ । नेपाल स्टक एक्सचेञ्ज(नेप्से)मा आज पनि उच्च कारोबार भईरहेको छ । नेप्सेमा कारोबार खुलेको साढे २ घण्टाको अवधिमा १२ अर्ब बढीको कारोबार भएको छ ।

नेप्सेमा १२ अर्ब ८४ करोडको कारोबार भएको छ । अघिल्लो दिन नेप्सेमा हालसम्मकै उच्च कारोबार भएको थियो । हिजो नेप्सेमा २१ अर्ब ९१ करोड १५ लाख बढीको कारोबार भएको थियो । त्यसअघि विसं २०७८ साउन ३१ गते २१ अर्ब ६४ करोड बढीको कारोबार भएको थियो । हिजो कारोबारका साथ–साथै कारोबार संख्या पनि हालसम्मकै उच्च भएको थियो । त्यस दिन ३२२ वटा स्क्रिप्टको ५ करोड ९ लाख ६७ हजार ९५१ कित्ता सेयर कारोबार भएको थियो ।

नेप्सेले आज पनि बजारको मोमेन्टमलाई कायम राखेको छ । आज नेप्से परिसूचक १.०३ प्रतिशत अर्थात २८.४५ अंकले बढेर २७ सय ८९.३७ विन्दुमा कारोबार भईरहेको छ । आज नेप्से परिसूचक २८०५ विन्दुसम्मको उचाईमा पुगेको थियो भने न्यून विन्दु २ हजार ७४७ विन्दुसम्म झरेको थियो ।

यो समाचार तयार पार्दासम्म १२२ वटा कम्पनीको सेयरमूल्य बढेको छ भने ११९ वटाको घटेको छ । पछिल्लो समय सेयर बजारमा सेक्टर रोटेशन हुँदै कारोबार भईरहेको छ । यस्तै क्रममा आज जीवन बीमा समूहमा सर्वाधिक वृद्धि देखिएको छ । यो समूह आज ५.७९ प्रतिशतले बढेको छ । आज ४ वटा समूहबाहेक अन्य सबै समूहमा हरियाली छाएको छ ।

यो बेलासम्म ७ वटा कम्पनीको सेयरमूल्यमा सकारात्मक सर्किट लागेको छ । आज पनि हिमालय रि इन्स्योरेन्सको सर्वाधिक कारोबार भईरहेको छ । यो कम्पनीको ३५ करोड ३९ लाख बढीको कारोबार भएको छ ।