.gif)
_(1).gif)
काठमाण्डौ । मौद्रिक नीति सार्वजनिक भएपछि एकाएक बढ्न थालेको सेयरबजारमा सबै कम्पनीहरु चल्न थालेका छन् । सेक्टरवाइज सबै कम्पनीहरुको सेयरभाउ केही प्रतिशत बृद्धि भएका छन् ।
लामो समयसम्म सेयरभाउ नबढेर लगानी डुबेका लगानीकर्ताहरुको केही प्रतिशत भएपनि लगानी उठ्न थालेको छ । बजारमा हाई तथा लो सबै खालका कम्पनीहरु चल्न थालेपछि लगानीकर्ताहरुमा उत्साह थपिएको छ ।
‘बुलिस ट्रेन्ड’मा चलेको बजारमा वित्तीय अवस्था नाजुक भएका कम्पनीहरुको समेत सेयरभाउ अप्रत्याशित ढंगबाट बृद्धि भएको देख्न सकिन्छ । केही लगानीकर्ताहरुले बढ्दो बजारमा फेरी चलखेल भएको भन्दै नयाँ लगानीकर्तालाई बुझेर मात्रै लगानी गर्न सुझाव समेत दिइरहेका छन् ।
.gif)
वित्तीय अवस्था बलियो नहुँदा पनि केही कम्पनीहरुको सेयरभाउ ह्वारह्वारती बढ्दै गएपछि बजारमा चलखेल गरेर सेयरमूल्य बढाउन थालेको आरोपहरु लाग्न थालेको छ । फाइनान्स समूहको नेपाल फाइनान्स कम्पनी, लगानी समूहको सीइडीबी हाईड्रोपावर, माइक्रोफाइनान्स समूहको समाज लघुवित्त जस्ता कम्पनीहरु बजारमा अहिले निकै चर्चामा छन् ।
यी कम्पनीहरुको वित्तीय विववरण केलाउने हो भने अवस्था एकदमै कमजोर देखिन्छन् । र पनि सेयरभाउ भने अप्रत्याशित ढंगबाट दिनहुँ बढ्दै जानुले चलखेल गरी बढाइएको अनुमान धेरैले लगाइरहेका छन् ।
सेयरबजारमा सेक्टरवाइज सबै खालका कम्पनीहरु चलेपनि पछिल्लो समय बजारमा फाइनान्स कम्पनीहरु निकै चर्चामा छन् । ठूलो लगानीकर्ताहरु बढी फाइनान्स समूहका कम्पनीका स्टक होल्डर रहेको धेरैले अनुमान लगाएका छन् । सेयरबजारमा सबै समूह घट्दा फाइनान्स सूचक मात्रै बढेको नेप्सेको रेडर्कमा समेत छ ।
अहिलेको बढ्दो बजारमा जताततै फाइनान्स समूहकै धेरै चर्चा छ । विशेषगरी नेपाल फाइनान्सको अप्रत्याशित ढंगबाट सेयरभाउ बढेपछि फाइनान्स समूहकै चर्चा बढ्न थालेको हो । साथै नाम चलेका ठूला लगानीकर्ताहरुले समेत खुलेआम सामाजिक सञ्जालमा फाइनान्स समूहको बारेमा पोष्ट्याउँदा फाइनान्स समूहका कम्पनीहरु चलेका छन् ।
फाइनान्स कम्पनीहरुको वित्तीय अवस्था हेर्ने हो भने त्यति सन्तोषजनक देखिँदैन तर केही वित्त कम्पनीको सेयरभाउ हेर्ने हो भने अनुमान गरिएभन्दा बढी अंकले बढेको देखिन्छ ।
नेप्सेमा १५ वटा वित्त कम्पनीहरु सूचीकृत छन्, जसमा सर्वाधिक सेयरभाउ नेपाल फाइनान्सको छ । कम्पनीको अन्तिम सेयरभाउ २ हजार १५४ रुपैयाँ छ, जुन यो सो कम्पनीको मात्रै नभई सम्पूर्ण फाइनान्स कम्पनीहरुकै उच्च मूल्यको नयाँ रेकर्ड हो ।
गत असार १२ गते नेपाल फाइनान्सको सेयरभाउ एक हजार रुपैयाँ नाघेको थियो । कम्पनीको सेयरभाउ फेरी केही दिन घट्दै ८ सयको आसपास पुगेको थियो । साउन ३ गतेदेखि पुनः सो कम्पनीको सेयरभाउ लगातार बढेर २१ सय माथि पुगेको छ ।
त्यस्तै, दोस्रो धेरै सेयरमूल्य गोर्खाज फाइनान्सको रहेको छ । फाइनान्सको अन्तिम सेयरभाउ ९३१ रुपैयाँ छ । कम्पनीको सेयरभाउ ५२ हप्ताकै उच्च विन्दु नजिक पुग्न १।५९ प्रतिशत बाँकी छ । ५२ हप्ताको उच्च सेयरभाउमा कम्पनीको मूल्य ९४६ रुपैयाँ पुगेको थियो ।
त्यस्तै, प्रोगेसिभ फाइनान्सको सेयरभाउ पनि ०.०२ प्रतिशतले मात्रै ५२ हप्ताकै उच्च विन्दुमा पुग्न बाँकी छ । कम्पनीको अन्तिम सेयरमूल्य ६५७.३० रुपैयाँ रहेको छ । ५२ हप्ताको उच्च मूल्यमा कम्पनीको सेयरभाउ ६५७.४० रुपैयाँ थियो ।
यसका साथै श्री इन्भेष्टमेन्ट फाइनान्सको सेयरभाउ पनि ५२ हप्ताकै विन्दु नजिक पुगेको छ । कम्पनीको अन्तिम सेयरभाउ ६८६ रुपैयाँ रहेको छ । यसअघि कम्पनीको उच्च मूल्य ६९६.९० रुपैयाँ थियो । सोही मूल्य कायम गर्न कम्पनीको सेयरभाउ १।५६ प्रतिशतले सेयरभाउ बढ्नुपर्ने हुन्छ ।
त्यस्तै, बेष्ट फाइनान्सको सेयरभाउ पनि २.६९ प्रतिशतले बढ्ने हो भने ५२ हप्ताकै उच्च मूल्य कायम गर्नेछ । कम्पनीको अन्तिम सेयरमूल्य ६३२.५० रुपैयाँ छ । यसअघि कम्पनीको उच्च मूल्य ६५० रुपैयाँ थियो ।
.jpg)
.gif)
.gif)
.gif)
