संंसदमै उठ्यो चार कम्पनीको मूल्य कृत्रिम बढाइएको विषय, अमरेश सिंहले सेयर कारोबारीको नामै तोकेर उठाए प्रश्न

STOCK MARKET
सोमबार, श्रावण २१,२०८१ 18:08:31

काठमाण्डौ । प्रतिनिधिसभा सदस्य तथा स्वतन्त्र सांसद अमरेशकुमार सिंहले सहकारीमा जस्तै सेयर बजारमा समेत सोझा जनतालाई लुट्ने र डूबाउने काम भइरहेको भन्दै नामै तोकेर केही कारोबारीमाथि कारबाहीको माग गरेका छन् ।

स्वतन्त्र सांसद सिंहले सोमबार प्रतिनिधिसभाको बैठकमा बोल्दै केही कम्पनीको नामै तोकेर तीव्र कर्नरिङ भइरहेको र कृत्रिम ढंगले मूल्य बढाएर सोझा लगानीकर्तालाई लुट्ने काम भएको भन्दै सरकारको ध्यानाकर्षण गराएका हुन् ।

उनले केही सेयर कारोबारीहरुको नेतृत्वमा भइरहेको यस्तो लूटधन्दा तत्काल बन्द गर्न र सहकारीमा जस्तै फेरि जनतालाई गुमराहमा राखेर बर्बाद पार्ने खेल अन्त्य गर्न समेत आग्रह गरेका छन् ।

त्यसका लागि उनले एक छानबिन समिति गठन हुनुपर्ने माग राखेका छन् ।

सांसद सिंहले नेपाल फाइनान्स, एनआरएन इन्फ्रास्टक्चर एण्ड डेभलपमेन्ट लिमीटेड, सीईडिबी हाइड्रोपावर डेभलपमेन्ट कम्पनी र हाथ्वे इन्भेष्टमेन्ट नेपाल लिमीटेडको नामै तोकेर यी कम्पनीको सेयरमा तीव्र चलखेल भएको दाबी गरेका हुन् ।

‘जनताले हिजो सहकारीमा अर्बौ रुपैयाँ गुमाए । त्यस्तै समस्या अहिले सेयर बजारमा देखिएको छ । कतिपय कम्पनीको सेयरको मूल्य कृत्रिम रुपमा बढाएर जनता लूट्ने काम भइरहेको छ । यसमा केही ब्रोकर र ठूला लगानीकर्ताले तीव्र कार्टेलिङ गरेका छन् ।’ उनले अगाडि भनेका छन्–‘बुक भ्यालू १३४ रुपैयाँ मात्र रहेको नेपाल फाइनान्स भन्ने कम्पनी रहेछ दीपेन्द्र अग्रवालको । त्यसको मूल्य एकमहिनाअघि ६०० रुपैयाँ थियो, बढाएर २१०० माथि पुर्याइसकिएको छ । जसको अर्निङ रेसियो पनि राम्रो छैन ।’

उनले अझ अगाडि भनेका छन्–‘सन्दीप जलानको अर्को कम्पनी रहेछ एनआरएन इन्फ्रास्टक्चर एण्ड डेभलपमेन्ट लिमीटेड । यो कम्पनीको सेयरमूल्य पनि ३०० रुपैयाँ थियो, बढाएर १०५० पुर्याइसकिएको छ । यसको बुक भ्यालू १४७ रुपैयाँ मात्र छ । अनिल रुंगटाको अर्को कम्पनी रहेछ सिएचडिसी हाइड्रो, यसको पनि ६५० रुपैयाँको सेयरमूल्य कार्टेलिङ गरी १८०० पुर्याइसकिएको रहेछ । यसको बुक भ्यालू १७० रुपैयाँ मात्र छ । अर्को कम्पनी अम्बिका पौडेलको रहेछ, हाथ्वे इन्भेष्टमेन्ट कम्पनी । यसको मूल्य ३०० रहेछ एकमहिनाअघि अहिले बढाएर १६०० पुर्याइसकिएको छ । जबकि यसको बुक भ्यालू त ७७ रुपैयाँ मात्र छ ।’

सांसद सिंहले वित्तीय सूचक राम्रो नरहेका कम्पनीहरुको सेयरमूल्य कृत्रिम रुपमा बढाइनु पछाडिको कारण केही ठूला लगानीकर्ता र ब्रोकरको सिण्डिकेट पनि भनेका छन् । ‘अनलाइन क्लब हाउसबाट जनतामा गुमराह छर्ने र सोसल मिडियाबाट थप गुमराहमा राखेर कर्नरिंग हुँदै आएको छ । यस्तो धन्दामा म सरकारको ध्यानाकर्षण गराउन चाहन्छु ।’उनले थपेका छन् ।

उनले बजारका नियामकहरु धितोपत्र बोर्ड, नेपाल स्टक एक्सचेञ्जले यो विषयमा छानबिन गर्न नसकेका आरोप समेत लगाएका छन् । बजारमा कर्नरिङका लागि अपारदर्शी स्रोतबाट पैसा भित्रिरहेको दाबी गर्दै उनले राष्ट्रबैंकले समेत यस्ता शंकास्पद लगानीहरुमा केन्द्रीत रही छानबिन गर्नुपर्नेमा जोड दिए । ‘गरीब जनतामाथि ठगी भइरहेको छ, म अर्थमन्त्रालयको विशेष ध्यानाकर्षण गराउन चाहन्छु ।’ सिंहले अगाडि भनेका छन्–‘जनतालाई गुमराहमा राख्ने र कृत्रिम रुपले सेयरको मूल्य बढाउने कारोबारीहरुमाथि छानबिनका लागि एउटा समिति बनाउन समेत म सरकारको ध्यानाकर्षण गराउन चाहन्छु ।’