घट्यो एनआईसी एशिया लघुवित्तको नाफा, ईपीएस ७.३१ रुपैयाँ

Capital Market
शुक्रबार, श्रावण २५,२०८१ 14:40:16

काठमाण्डौ । एनआईसी एशिया लघुवित्त वित्तीय संस्था लिमिटेडले गत आव २०८०/८१ को वित्तीय विवरण सार्वजनिक गरेको छ । जसअनुसार संस्थाले १२ करोड ७१ लाख रुपैयाँ खुद नाफा आर्जन गरेको छ ।

यो रकम अघिल्लो आवको सोही अवधिको तुलनामा ३२.८२ प्रतिशतले कम हो । अघिल्लो आवको चौथो त्रैमाससम्ममा संस्थाले १८ करोड ९२ लाख रुपैयाँ खुद नाफा आर्जन गरेको थियो ।

संस्थाको खुद ब्याज आम्दानीमा आएको गिरावटका कारण नाफामा कमी आएको हो । संस्थाको खुद ब्याज आम्दानी ११.९२ प्रतिशतले घटेको छ । यससँगै संस्थाको खुद ब्याज आम्दानी ९५ करोड १६ लाख रुपैयाँमा सीमित बनेको छ । अघिल्लो.आवमा संस्थाले १ अर्ब ८ करोड रुपैयाँबराबरको खुद ब्याज आम्दानी गरेको थियो ।

ब्याज आम्दानीसँगै संस्थाको खुद शुल्क तथा कमिशन आम्दानी पनि घटेको छ । संस्थाको खुद शुल्क तथा कमिशन आम्दानी ६५.१९ प्रतिशतले घटेर १ करोड २१ लाख रुपैयाँमा सीमित बनेको छ ।

९८ करोड ८७ लाख रुपैयाँ खुद सञ्चालन आम्दानी भएको संस्थाको सञ्चालन मुनाफा २१ करोड १२ लाख रुपैयाँ रहेको छ । यस्तै संस्थाको चुक्तापूँजी १ अर्ब ७३ करोड रुपैयाँबराबरको रहेको छ ।

अघिल्लो आवमा ७३ करोड ७१ लाख रुपैयाँ रहेको संस्थाको रिटेन्ड अर्निङ ४३ करोड ६० लाख रुपैयाँ रहेको छ । रिजर्भको आकार भने ५९ करोड २४ लाख रुपैयाँबाट बढेर ७५ करोड रुपैयाँ पुगेको छ ।

संस्थाले समीक्षा अवधिसम्ममा ग्राहकहरुबाट १ अर्ब ५४ करोड रुपैयाँबराबरको निक्षेप संलकन र १५ अर्ब ९४ करोड रुपैयाँबराबरको कर्जा परिचालन गरेको छ ।

संस्थाको खराब कर्जा अनुपात भने बढेको छ । अघिल्लो आवमा ६.२७ प्रतिशतमा रहेको खराब कर्जा अनुपात ९.९२ प्रतिशत पुगेको छ ।

समीक्षा अवधिसम्म संस्थाको प्रतिसेयर आम्दानी(ईपीएस)७.३१ रुपैयाँ, प्रतिसेयर नेटवर्थ १६८.१९ रुपैयाँ, प्रतिसेयर कुल सम्पत्तिको मूल्य १ हजार १५७.४२ रुपैयाँ, मूल्य आम्दानी अनुपात ९६.४७ गुणा र तरलता अनुपात ४७.७३ प्रतिशत कायम छ ।