एनभिडियाका सीईओ जेनसेनको सम्पत्ति क्षणभरमै १० अर्ब डलरले स्वाहा

काठमाण्डौ । अमेरिकी टेक कम्पनी एनभिडियाका प्रमुख कार्यकारी अधिकृत(सीईओ) जेनसेन हुवाङको सम्पत्ति एकैदिन १० अर्ब डलरले घटेको छ । मंगलबार कम्पनीको सेयरमूल्यमा आएको करिब १० प्रतिशतको पहिरोका कारण हुवाङको सम्पत्तिमा तीव्र गिरावट आएको हो ।

मंगलबार उनको सम्पत्ति १० अर्ब डलरले घटेर ९४.९ अर्ब डलरमा सीमित बनेको छ । यो उनको सम्पत्तिमा एक दिनमा आएको अहिलेसम्मकै उच्च गिरावट हो । हुवाङ विश्वको १८ औं धनी व्यक्ति हुन् । बितेको एक वर्षमा उनको सम्पत्ति ५१ अर्ब डलरले बढेको छ ।

अमेरिकाको न्याय विभागले कम्पनीलाई एन्टी ट्रष्ट कानून उल्लंन गरेको सम्बन्धमा प्रमाण जुटाउन पत्र लेखेका कारण कम्पनीको सेयरमूल्यमा पहिरो गएको बताइएको छ ।