ग्राउण्ड जिरोको लगानीकर्ता भन्छन् ‘असोज महिनाका लागि ब्याजदर अझै घट्दै छ, बजार फेरि बढ्छ’

काठमाण्डौ । सधैंको साता जस्तै आज पनि हामीले विभिन्न ब्रोकर हाउसहरुमा पुगेर लगानीकर्ताहरुको विचार सुन्ने र बुझ्ने कार्यलाई निरन्तरता दिएका छौं । हिजोआज बजार केही सुस्ताए पछि ब्रोकरहाउसहरुमा लगानीकर्ताको संख्या पनि घट्दै गएको छ । कुनै बेला थेगिनसक्नु लगानीकर्ताको उपस्थिती हुने ब्रोकर हाउसहरुमा अहिले सामान्य संख्यामा मात्रै लगानीकर्ता आउन थालेका छन् ।  

आज हामीले पुतलीसडक आसपासका ब्रोकर हाउसहरु पुगेर लगानीकर्ताहरुको विचार सुन्ने र बुझ्ने  प्रयास गरेका छौं । सबै भन्दा पहिले आज हामी सेक्योर्ड सेक्युरिटिज (स्टक ब्रोकर नम्बर ३६) मा पुग्यौं । ब्रोकर हाउसमा फोनका घण्टी बजिरहेका थिए । आज करोबारको पहिलो सत्रमा बजार करिब ५० अंकले बढेको थियो । यतिकैमा केही लगानीकर्ताहरु निकै उत्साहित हुँदै ब्रोकरहाउसमा पसे । ‘आज त लो कारोबार पनि बढेको छ, बजार पनि बढेको छ । आज बैंकिङ इन्डेक्स बढेर कारोबार १५ अर्ब माथि भएमा बजारले फेरी अप ट्रेन्ड लिन्छ,’ एक लगानीकर्ताले भने । यतिकैमा ती लगानीकर्ताको मोबाइलमा फोनको घण्टी बज्यो । उनले फोनमा साथिलाई भने, ‘लौ आउनुहोस है साथि, आज बजार बढेको छ ।’

फोनमा कु्रा गरिसकेपछि उनले आफु बानेश्वमा बसोवास गर्ने बताए । ‘पहिले ५० वटा घरमा १ घरमात्रै सेयर कारोबारी थिए । अहिले त ५० वटा घरमा ४५ वटा घर सेयर कारोबारी छन् । बाँकी घरलाई पनि मैले सेयरमा ल्याउने कोशिस गर्दै छु उनले भने ,‘सेयर बजार त मल्टी ब्यागर ठाँउ हो । अर्थात यहाँ त झोला भरी पैसा नै पैसा छ । तपाईलाई एक झोला पैसा मात्रै चाहिएको भए अरु व्यापार गर्नुहोस ।  धेरै झोला पैसा चाहिएको भए सेयर कारोबारमा आउनु होस ।’

यस बेलासम्म दिनको १२ बजिसकेको थियो । बजारमा विस्तारै बिक्री दबाब आउन थालको थियो ।  

यहाँबाट हामी पुतलीसडकमा नै रहेको श्वेता सेक्युरिटिज (स्टक ब्रोकर नम्बर २५) मा पुग्यौं । यहाँ भने लगानीकर्ताहरुको उपस्थिति राम्रै थियो । लगानीकर्ता आ–आफ्नै धुनमा मस्त थिए । ‘लौ ! दशैं खर्च निकाल्नु पर्ला भनेको त बजारले देला जस्तो छैन,’ एक जना लगानीकर्ता भने । उनीसँगै बसेका लगानीकर्ताले पनि उनीसँग सहमत हुँदै भने, ‘असोजको महिना खर्च ज्ुटाउनु पर्ने बेला बजारले देला जस्तो छैन ।’  

सँगैका लगानीकर्ताले ढाडस दिदै भने, ‘हतास नुहुनुहोस न मित्र, अब असोज महिना पनि ब्याज दर घट्दै छ । सेयर बजार त फेरी माथि जान्छ यो खरिद गर्ने मौका हो ।’  

केही समयपछि यहाँबाट हामी पुतलीसडक नजिकै रहेको प्राइमो सेक्युरिटिज (स्टक ब्रोकर नम्बर १६) मा पुग्यौं । यहाँ लगानीकर्ताहरुको उपस्थिति सामान्य नै थियो । यहाँ भेटिएका लगानीकर्ताले पनि असोज महिनाको लागि ब्याजदर घट्ने दाबी गरे । ब्याजदर घट्ने क्रममा रहेकाले बजार अब धेरै नघट्ने उनीहरुको तर्क थियो । यसै ब्रोकरमा भेटिएका एक लगानीकर्ताले यो बुलमा एचआईडिसिएल प्रमोटरको सेयरमा राम्रै पैसा बनाएको भन्दै गफ हाँके ।  

यसपछि हामी नयाँ गन्तव्य, प्रिमिएर सेक्यूरिटिज (स्टक ब्रोकर नम्बर ३२) पुग्यौं । यहाँ पनि लगानीकर्ताहरुको उपस्थित राम्रै थियो । यस बेलासम्म दिनको २ बजिसकेको थियो । बजार निरन्तर घटिरहेको थियो । यहाँ भेटिएका लगानीकर्ताले २ बजे पछि बजार घट्नुमा केही शंका पनि व्यक्त गरे । ती लगानीकर्ताले भने, ‘मेरो त नेपाल फाइनान्सको सेयर थियो । बजार घटे पछि त पोर्टफोलियो राम्रै घटेको छ ।’

उनको कुरा सुनेपछि अर्का एक लगानीकर्ताले भने, ‘बेच्न जान्नु पर्छ के, बेच्न । हिजो फाइनान्स समूहको कमलपोखरीको एक पार्टी प्यालेसमा भोज थियो रे आफू त जान पाइएन । सेयर खाइयो भोज खाइएन ।’