सर्वसाधारणका लागि एनएलजी इन्स्योरेन्सको संस्थापक सेयर बिक्रीमा, न्यूनतम मूल्य कति ?

काठमाण्डौ । एनएलजी इन्स्योरेन्स कम्पनी लिमिटेडले संस्थापक सेयर बिक्रीमा राखेको छ । कम्पनीले आजदेखि संस्थापक सेयरधनीको स्वामित्वमा रहेको १६ सय कित्ता संस्थापक सेयर बिक्रीमा राखेको हो ।  

सेयरको न्यूनतम मूल्य प्रतिकित्ता ४५० रुपैयाँ तोकिएको छ । सेयर खरिदका लागि योग्य इच्छुक जो कोही व्यक्ति, कम्पनी, संघ, संस्थाहरुले आवेदन दिन सक्नेछन् । लगानीकर्ताले असोज ७ गतेभित्र बिक्री प्रबन्धक आरविवि मर्चेन्ट बैंकिङको कार्यालयमा आइपुग्ने गरी प्रति कित्ता के कति दर रेटमा लिन कबुल गर्ने हो उल्लेख गरि गोप्य शिलबन्दी बोलपत्र आवेदन पेश गर्नु पर्नेछ ।  

कम्पनीले विद्यमान संस्थापकहरुलाई प्राथमिकता दिई गत असार २६ गते ३५ दिने सूचना प्रकाशित गरी उल्लेखित सेयर बिक्रीमा राखेको थियो । तर निर्धारित समयभित्र आवेदन नपरेपछि कम्पनीले सर्वसाधारणका लागि उक्त सेयर बिक्री गर्न लागेको जनाएको छ ।