रवि लामिछानेलाई पक्राउ गर्न प्रहरी टोली परिचालन, साझेदार नियन्त्रणमा

काठमाण्डौ । सहकारी ठगी प्रकरणमा रास्वपाका सभापति रवि लामिछानेलाई पक्राउ गर्न प्रहरी टोली परिचालन भएको छ ।  

प्रहरी पक्राउ गर्न परिचालन भएको सूचनापछि काठमाण्डौको वनस्थलीस्थित रास्वपाको केन्द्रीय कार्यालयमा नेता तथा कार्यकर्ता जम्मा भएका छन् । पार्टी सभापति पक्राउ पर्ने खबर पाएलगत्तै उपत्यकामा रहेका कार्यकर्ताहरुलाई आकस्मिक रुपमा पार्टी कार्यालयमा भेला हुन भनिएको थियो । सोही उर्दीपछि अहिले पार्टी कार्यालयमा रास्वपाका नेता तथा कार्यकर्ताको भीड जम्मा भएको छ । 

आज दिउँसो गृह मन्त्रीले सहकारी छानबिनका लागि गठित संसदीय समितिको प्रतिवेदन कार्यान्वयन गर्न प्रहरीलाई निर्देशन दिएको थियो । सो निर्देशनपछि प्रहरी हेडक्वार्टरले संसदीय समितिको प्रतिवेदनले कारबाहीको सिफारिस गरेका सहकारी ठगहरुलाई पक्राउ गर्न प्रहरी परिचालन गरेको हो ।  

रवि लामिछानेलाई पक्राउ गर्न प्रहरी परिचालन गर्नुअघि सहकारी ठगी प्रकरणमा छविलाल जोशी आइतबार नै पक्राउ परिसकेका छन् ।

उनी काठमाण्डौबाट भाग्न खोजेको सूचना पाएपछि प्रहरीले शंखमूल क्षेत्रबाट पक्राउ गरेको बताइएको छ । उनलाई कास्की प्रहरीलाई जिम्मा लगाउने तयारी भइरहेको छ ।  

जोशी गोरखा मिडिया नेटवर्कका सञ्चालक हुन् । अध्यक्ष जीबी राई फरार छन् भने प्रबन्ध निर्देशक रहेका रवि लामिछाने पनि सम्भवतः आजै पक्राउ पर्ने छन् ।