भारतको सेयर बजारमा भारी गिरावट, जापानको बजारमा भने हरियाली

काठमाण्डौ । भारतको सेयर बजारमा ठूलो गिरावट आएको छ । आज भारतको सेयर बजारमा करिब १८ सय अंभन्दा बढीको गिरावट आएको छ ।  

यो समाचार तयार पार्दासम्म भारतको सेयर बजारमा मापक इन्डेक्स सेन्सेक्स २.१३ प्रतिशत अर्थात १७ सय ८७ अंकले घटेको छ । यो गिरावटसँगै सेन्सेक्स इन्डेक्स ८२ हजार ४६७ विन्दुमा सीमित बनेको छ ।  

यस्तै ५० वटा कम्पनीको सेयर कारोबार हुने निफ्टी५० पनि २.१९ प्रतिशत अर्थात ५५९ अंकले घटेको छ । यो गिरावटसँगै निफ्टी २५ हजार २४९ विन्दु कायम भएको छ ।  

आज भारतको सेयर बजारमा अटो,फाइनान्स र बैंकिङ समूहमा भारी गिरावट आएको छ । टाटा मोटर्स,बजाज फाइनान्स र मारुती जस्ता कम्पनीको सेयरमूल्य ३ प्रतिशतभन्दा धेरैले घटेको छ ।  

यो साता भारतको सेयर बजारमा २५ सय अंकको गिरावट आईसकेको छ । इराक र इरानको युद्धका कारण विश्व सेयर बजारको सेन्टिमेन्ट यतिबेला नकारात्मक बनेको छ । यसैको प्रभाव भारतको सेयर बजारमा समेत देखिएको छ ।  

आज जापानको सेयर बजारमा भने हरियाली छाएको छ । जापानको निक्की२२५ इन्डेक्स १.९७ प्रतिशत अर्थात ७४३ अंकले बढेको छ । यो वृद्धिसँगै निक्की ३८ हजार ५५२ विन्दुमा पुगेको छ ।  

यस्तै आज हङकङकको हाङसेङ इन्डेक्स २.४३ प्रतिशत र कोरियाको कोस्पी इन्डेक्स १.२२ प्रतिशतले घटेका छन् ।