छनौट समितिका संयोजकलाई डेंगु भएपछि सेबोन अध्यक्षको अन्तर्वार्ता र प्रस्तुति अनिश्चित

काठमाण्डौ । नेपाल धितोपत्र बोर्ड(सेबोन)को अध्यक्ष छनौटको प्रक्रिया पुनः अलपत्र परेको छ ।  

छनौट समितिका संयोजक तथा राष्ट्रिय योजना आयोगका उपाध्यक्ष प्रा.डा. शिवराज अधिकारी डेंगु संक्रमण भई अस्पताल भर्ना भएपछि आज(शुक्रबार) हुने भनिएको सेबोन अध्यक्षका बाँकी ३ उम्मेद्वारको प्रस्तुतिकरण र अन्तर्वार्ता प्रक्रिया अलपत्र परेको हो ।  

संयोजक नै बिरामी भई अस्पताल भर्ना भएपछि छनौट समितिका सदस्यहरु समेत आज उपस्थित भएनन् । जसकारण सबै तयारी गरी प्रस्तुति दिन निर्धारित समयमै अर्थ मन्त्रालय पुगेका तीनै जना उम्मेद्वार केहीबेर कुरेर फर्किएका थिए । 

सेबोनको अध्यक्षका लागि पुष्पकमल दाहाल नेतृत्वको सरकारको पालामा ५ जनाको नाम सर्टलिस्ट गरिएको थियो । सो क्रममा सन्तोषनारायण श्रेष्ठ र मुक्ति श्रेष्ठ मात्र प्रस्तुतिकरण र अन्तर्वार्तामा पुगेका थिए । बाँकी तीनजना कृष्णबहादुर कार्की, चिरञ्जिवी चापागाई र नवराज अधिकारीले भने छनौट प्रक्रिया नै बहिस्कार गरेका थिए ।  

छनौट तथा सिफारिस समितिले ३ जनाको नाम मन्त्रिपरिषदमा सिफारिस गर्नैपर्ने कानूनी बाध्यता रहेका कारण सेबोन अध्यक्ष छनौट प्रक्रिया अलपत्र परेका थियो ।

 ९ महिनादेखि रिक्त सेबोन अध्यक्ष पदको पुरानै छनौट प्रक्रिया अगाडि बढाउने अहिलेको सरकारले निर्णय गरेपछि प्रक्रिया पुनः अगाडि बढेको थियो । जसअनुसार अघिल्लो सरकारको पालामा अन्तर्वार्ता बहिस्कार गरेका कार्की, चापागाई र अधिकारी नै अर्थ मन्त्रालय पुगेका थिए ।  

छनौट समितिका संयोजक डा. अधिकारी बिरामी भई अस्पताल भर्ना भएपछि अब सेबोन अध्यक्ष छनौट प्रक्रिया सम्भवतः दशैंपछि मात्र हुने स्रोतले जनाएको छ ।