इन्द्रचोकको गल्लीमा चङ्गा उडाएका छोटेलाल रौनियार भन्छन्-'बजारले अब छलाङ मार्छ, सेयरमा लगानी गरौं'

काठमाण्डौ । देशमा दसैंको उमङ्ग छ । विदेशमा बस्ने नेपालीहरुमाझ पनि महान पर्व दसैंको उस्तै रौनक छ । काठमाण्डौमा नै जन्मेहुर्केका नेपाल इन्भेष्टर फोरमका निबर्तमान अध्यक्ष  छोटेलाल रौनियारको दशैं अनुभव भने केही भिन्न रहेको छ।  

रौनियार काठमाण्डौको इन्द्रचोक क्षेत्रमा जन्मी हुर्किएका व्यक्ति हुन् । दशैंभन्ने बित्तिकै उनलाई बाल्यकालमा पैसा उठाएर काठमाण्डौमा चङ्गा उडाएको याद आउँछ । 

सेयर बजारमा लागेपछि पनि चङ्गा उडाएका यादहरु छन् । बालापनमा घरको कौशीमा बसेर चङ्गा उडाएको विगत सम्झिँदा मात्र पनि रौनियार पुलकित हुने गर्छन् ।  

चङ्गा उडाउँदा उनका साथी ज्ञानरत्न तुलाधर कौशीबाट खसेर बल्लतल्ल बाँचेको उनलाई अझै पनि याद छ । ‘त्यो समयमा काठमाण्डौमा १० पैसामा नै चङ्गा पाइन्थ्यो । हामीले इन्द्र चोकको गल्ली गल्ली पुगेर चङ्गा उडाउँथ्यौं । त्यो बेलाको चङ्गा उडाउँदाको खुशी अहिले करोडौं खर्च गर्दा पनि पाइन्न ।’ रौनियारले भने । 

‘जे खुसि छ, त्यो बालपनमा नै थियो । मैले एक अमेरिकी साथीसँग पनि मिलेर चङ्गा उडाएको याद आउँछ । महान पर्वहरुको अवसरमा पाइने त्यो बेलाको खुशी र यसको मीठास अहिले सायदै पाइन्न ।’ उनले थप्दै भने ।  

दसैंको अवसर पारेर धेरैपटक रौनियार स्वदेशका विभिन्न गन्तव्य घुम्न निस्किएका छन् । उनले एभरेष्ट बेसक्याम्प तथा अन्य हिमालका बेसक्यम्पमा दशैं मनाएका प्रशस्त यादहरु सँगालेका छन् ।  

उनी भन्छन्–‘काठमाण्डौबाहिर ठूलो देश र घुम्ने ठाउँ रहेको छ । तर यो पटक भने मौसम र बाटोले गर्दा बाहिर घुम्न गइँन ।’

लगानीकर्ता तथा नियामक निकायलाई दसैं, तिहार र छठको  शुभकाना दिँदै रौनियारले भने–‘पूँजीबजारको आउने समय निकै उज्वल रहेको छ ।  किनकी हिजो ३ हजार हुँदा सेयरबाजारको अबस्था जे रहेको छ अहिले पनि अबस्था त्यही नै रहेको कारण पूँजीबजारले फेरी छलाङ मार्नेछ । यो भनेको लगानी गर्ने नै समय हो । त्यसकारण दसैंको बजेटबाट अलिकति बचाएर पनि सेयर बजारमै लगानी गरौं ।’