ठाउँ अभावले लिङ्गे पिङ बन्न छाडे, दुर्गा भवानीको आशिर्वादले बजारले छिट्टै गति लिन्छ: राजकुमार तिमिल्सिना

काठमाण्डौ । नेपालमा बर्षात ऋतु सकिएर सरद ऋतु चलिरहेको छ । योसँगै बर्खाको हिलोमैलो, बाढीपहिरो रोकिएर नयाँ मौसम सुरु हुँदैछ । देश–बिदेशबाट परदेशिएकाहरु आउने क्रम चलिरहेको  छ । दसैं मनाउन धेरै मानिसहरु आफ्नो पुख्र्यौली थलो पुगिसकेका छन् । गाउँघरका खेतमा धानको बाला झुलिरहेको छ । तन्नेरी, युवायुवतीहरु लिङ्गे पिङमा रमाइरहेका छन् ।  

बाढीपहिरोले गर्दा देशमा सूदुरपश्चिम र सुदुरपूर्बका गाउँहरुमा पुग्न सहज मोटरबाटो छैन । पूँजीबजारमा लागेका लगानीकर्ताहरु पनि केही गाउँघर पुगेका छन् भने केहीले राजधानीमा नै दसैं मनाइरहेका छन् । 

भिजन सेक्यूरिटिज (स्टक ब्रोकर नम्बर ३४)का सञ्चालक राजकुमार तिमिल्सिना पनि यसपालिको दसैं मा राजधानीमा नै रमाइरहेका छन् । उनले राजधानीमा नै दसैं मनाउन थालेको यो पहिलो पटक भने होइन ।  

उनको बिचारमा दसैं भनेको धार्मिक रुपमा चलिआएको परम्परा तथा देवीप्रतिको आस्था हो । यो भनेको पूर्खादेखिको चलेको निरन्तरता हो । तर अहिले पहिलेको जस्तो बाटोघाटो बनाउने, रातो माटोले घर रङ्ग्याउने चलन नरहेको उनको भनाई छ ।

शहरमा पनि घरमा रङ्ग लगाउने चलन हट्दै गएको देखिन्छ । अहिले पहिलेको भन्दा दसैं केही भिन्न हुँदै गएको उनको बिचार रहेको छ ।  उनी भन्छन्–‘म अहिले बसेको कपनमा पनि पहिले  गाउँघरजस्तै हुन्थ्यो । बाँस नै गाडेर पिङ हाल्ने चलन थियो, तर ठाउँको अभावले त्यो हट्दै गयो । सबै कुरा खल्लो हुँदै गयो ।’  

पूँजीबजारमा लाग्ने लगानीकर्ताहरुलाई शुभकामना दिदैं उनी भन्छन्–‘पूँजीबजारको आगामी दिन सुनौला छन् । बजार घट्न रोकिएर फर्किने तरखरमा छ । दुर्गा भवानीको आशिर्वादले पूँजीबजारले छिट्टै गति लिनेमा म विश्वस्त छु ।’