गिरावटका साथ गर्‍यो नेप्सेले साताको सुरुवात, जानकार भन्छन्,‘आगामी कारोबारबाट सम्हालिन्छ बजार’

काठमाण्डौ । साताको पहिलो कारोबार दिन आज नेपाल स्टक एक्सचेञ्च (नेप्से) सामान्य अंकले घटेको छ । आज नेप्से परिसूचक ०.३४ प्रतिशत अर्थात ९.१९ अंकले घटेर २ हजार ६१७.९५ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.९३ प्रतिशतले घटेर ४६९.८० विन्दुमा झरेको छ । यो दिन नेप्सेमा सूचीकृत मध्ये ३२० वटा स्क्रिप्टको १ करोड ११ लाख ३४ हजार १७८ कित्ता सेयर ४ अर्ब ७३ करोड २४ लाख रुपैयाँभन्दा बढीको कारोबार भएको  छ ।

आजको बजारबारे अर्थशास्त्री सूर्यनारायण पौडेल भन्छन्,  ‘हाल लगानीकर्ता पर्ख र हेरको अवस्थामा रहँदा बजारले गति लिन सकेको छैन । आन्दोलन र राजनीतिक कारणले नयाँ लगानीकर्ता बजार प्रवेश गर्न सकेका छैनन् ।’

यसको साथै बैंक तथा वित्तीय संस्थाको वित्तीय विवरण समेत अपेक्षा अनुरुप आउन नसक्दा बजारले गति लिन नसकेको पौडेलको ठम्याई रहेको छ । ‘राजनीतिक रुपमा केही अन्यौलता रहेता पनि आर्थिक रुपमा भने बजारको अवस्था अनुकूल नै रहेको छ । त्यसैले केही ठूलाले सेयर संकलन गरेको हुन सक्ने देखिन्छ,’ उनले भने ।  

त्यसैगरि, अर्को बजार जानकार दामोदर गजुरेलले पनि आज सम्म सेयर बेचेका लगानीकर्ताले तिहारको लागि खर्च जुटाउन सक्ने भएको काराण आज बजारमा बिक्री दबाद आएको तर्क प्रस्तुत गरे । प्राबिधिक रुपमा पनि बजार २६०० विन्दुबाट तल नजाने र आगामी कारोबारबाट गति लिने गजुरेलले बताए । उनले भने, ‘आज बाट बजार सम्हालिएको छ । अब आन्दोलनको प्रभाव पनि सकिदै गएका कारण सेयर बजारमा ठूलो असर पर्दैन ।’

यो दिन नेप्सेमा सूचीकृत १३ वटा समूहमध्ये ५ वटा बाहेक अन्य सबैमा रातो पोतियो । आज जीवन बीमा समूहमा सर्वाधिक उछाल आयो । यो समूह आज १.१५ प्रतिशतले बढेर १२ हजार ८२५.७८ विन्दुमा पुग्यो ।  

यस्तै आज वित्त समूह १.११ प्रतिशत,वित्त ०.६९,हाईड्रो ०.४७ र व्यापार समूह ०.३९ प्रतिशतले बढ्यो ।  

बैंकिङ समूह आज सर्वाधिक घट्यो । यो समूह आज १.३० प्रतिशतले ओरालो लाग्यो । विकास बैंक समूह आज ०.५१ प्रतिशत,लगानी ०.१७, उत्पादन तथा प्रशोधन ०.९१,लघुवित्त ०.७३,म्युचुअल फण्ड ०.४२,निर्जीवन बीमा ०.४४ र अन्य समूह ०.३२ प्रतिशतले घट्यो ।  

धेरै कारोबार गर्ने कम्पनीहरु

यो दिन आईसीएफसी फाइनान्सको सर्वाधिक सेयर कारोबार भयो । आज यो कम्पनीको ३२ करोड ६४ लाख बढीको कारोबार भयो । एसबीआई बैंकको आज २१ करोड ६२ लाख,सिईडिबि हाईड्रोको १८ करोड ८६ लाख, नेपाल फाइनान्सको १८ करोड र समृद्धि फाइनान्सको १८ करोड १२ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ५ वटा कम्पनीको सेयरमूल्यमा सकारात्मक सर्किट लाग्यो । आज एलआईसी नेपाल,रिभर फल्स पावर,माईखोला हाईड्रोपावर,समृद्धि फाइनान्स र कालिञ्चोक दर्शनको सेयरमूल्यमा अपर सर्किट लाग्यो ।  

मकर जितुमाया सुरीको सेयरमूल्य पनि आज ७.३९ प्रतिशत,नेपाल फाइनान्सको ६.६८ र जानकी फाइनान्सको सेयरमूल्य ५.९० प्रतिशतले बढ्यो ।  

यो दिन नेपाल एसबीआई बैंकको सेयरमूल्य सर्वाधिक अर्थात ६.७९ प्रतिशतले घट्यो । प्राइम कमर्सियल बैंकको सेयरमूल्य ४.१७ प्रतिशत र राँवा इनर्जीको सेयरमूल्य ४.०३ प्रतिशतले घट्यो ।