नेप्सेमा २७.४१ अंकको वृद्धि,‘सम्हालिने प्रयासमा बजार’

काठमाण्डौ । साताको दोस्रो कारोबार दिन आज नेपाल स्टक एक्सचेञ्च (नेप्से)दोहोरो अंकले बढेको छ । आज नेप्से परिसूचक १.०४ प्रतिशत अर्थात २७.४१ अंकले बढेर २ हजार ६४५.३६ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.६८ प्रतिशतले बढेर ४७३.०२ विन्दुमा पुगेको छ । यो दिन नेप्सेमा सूचीकृत मध्ये ३०७ वटा स्क्रिप्टको १ करोड ४ लाख १८ हजार ९२६ कित्ता सेयर ५ अर्ब ३४ करोड ४८ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार अजय सिंह थापा (जय शम्भु) भन्छन्, ‘आन्दोलन र बैंकको रिपोर्टले घटेको बजार आज सम्हालिएको जस्तो देखिन्छ । अर्थात यो ठूलो करेक्सन रहेनछ भन्ने देखियो। ठूलो आन्दोलन नहुनु र चाडपर्व पनि सकिदै गएको कारण बजारले अब गति लिन सक्छ । तर त्यसको लागि प्राविधिक रुपमा २६७५ भन्दा माथि लागे पछि यसको निश्चिता हुन सक्छ ।’

आज बजारले बोलिङ्गरको मध्य ब्याण्डमा सपोर्ट लिएको र यसले बजारको गिरावट रोकिएको र बजार फिवोनासीको सपोर्ट विन्दुबाट माथि नै लागेकोले बजारले गति लिनेमा थापा ढुक्क देखिन्छन् ।  

त्यसैगरि, अर्का बजार जानकार गोविन्द प्रसाद घिमिरेले पनि आजको बढोत्तरी सामान्य रहेको र बजारमा सानो बाउन्स आएको प्रतिक्रिया दिए । बजारमा अब घट्ने भन्दा पनि बढ्नै नै सम्भावना रहेको र बजारले बोलिङ्गरको मध्य ब्याण्डमा सपोर्ट लिएको उनको तर्क रहेको छ । केही दिन यस्तै रहेता पनि चाडपर्व सकिए पछि बजारले गति लिनेमा घिमिरे पनि सहमत देखिए ।‘  

यो दिन नेप्सेमा सूचीकृत १३ वटै समूहमा हरियाली छायो । आज फाइनान्स समूह सर्वाधिक अर्थात ३.४६ प्रतिशतले बढ्यो । यस्तै बैंकिङ समूह ०.३६ प्रतिशत, विकास बैंक १.५७,होटल १.१७,हाईड्रो १.५८,लगानी ०.८५,जीवन बीमा १.८४,उत्पादन तथा प्रशोधन १.३४,लघुवित्त १.२६,म्युचुअल फण्ड ०.७२,निर्जीवन बीमा ०.६४,अन्य समूह ०.५७ र व्यापार समूह ०.७५ प्रतिशतले बढ्यो ।  

धेरै कारोबार गर्ने कम्पनीहरु

यो दिन नेपाल फाइनान्सको सर्वाधिक सेयर कारोबार भयो । आज यो कम्पनीको ३३ करोड ७९ लाख बढीको कारोबार भयो । समृद्धि फाइनान्सको आज २४ करोड ७६ लाख, एलआईसी नेपालको १९ करोड ८३ लाख र जानकी फाइनान्सको १६ करोड ६४ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा सकारात्मक सर्किट लाग्यो । आज जानकी फाइनान्स र दोल्ती पावरको सेयरमूल्यमा अपर सर्किट लाग्यो ।  

यस्तै रिभर फल्स पावरको सेयरमूल्य ९.५४ प्रतिशत,मेन्छियाम हाईड्रोपावरको ९.१३ र मायाखोला हाईड्रोपावरको सेयरमूल्य ६.९९ प्रतिशतले बढ्यो ।  

यो दिन पिपुल्स हाईड्रोपावरको सेयरमूल्य सर्वाधिक अर्थात ६.०२ प्रतिशतले घट्यो । कालिञ्चोक दर्शनको सेयरमूल्य पनि आज ४.३५,समृद्धि फाइनान्सको ३.९६ र विन नेपाल लघुवित्तको सेयरमूल्य २.८९ प्रतिशतले घट्यो ।