नेप्सेमा दोहोरो अंकको बढोत्तरी, ‘पर्ख र हेरको अवस्थामा बसेका लगानीकर्ता सक्रिय’

काठमाण्डौ । साताको तेस्रो कारोबार दिन आज नेपाल स्टक एक्सचेञ्च (नेप्से) दोहोरो अंकको उछाल आएको छ । आज नेप्से परिसूचक १.७६ प्रतिशत अर्थात ४६.६९ अंकले बढेर २ हजार ६९२.०५ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.७६ प्रतिशतले बढेर ४८१.२८ विन्दुमा पुगेको छ । यो दिन नेप्सेमा सूचीकृत मध्ये ३१९ वटा स्क्रिप्टको १ करोड ३३ लाख ७३ हजार ४८१ कित्ता सेयर ६ अर्ब १२ करोड ८२ लाख रुपैयाँभन्दा बढीको कारोबार भएको  छ ।

आजको बजारबारे नेपाल पूँजीबजार लगानीकर्ता संघकी अध्यक्ष राधा पोखरलेलले चाडपर्वको लागि खर्च जुटाउनेहरु सकिदै गर्दा बजारले हिजो आज सुधार आएको बताँउछिन् । पोखरेललको विचारमा लगानीकर्ता पर्ख र हेरको अवस्थामा बसेका लगानीकर्ता सक्रिय हुँदा बजारले गति लिएको हो । ‘केही राजनीतिक अन्यौल्ताले घटेको बजार अब भने सम्हालिदै गएको छ, उनले भने ।  

त्यसैगरि, अर्का बजार जानकार सुमन कुमार रिजालले पनि आजबाट लगभग करेक्सन सकिएको बताए । ‘अहिले मुद्यती निक्षेपमा पैसा राख्नु भन्दा सेयर बजारमा नै लगाउनु फाइदा रहेको छ । आज सूचकसँगै कारोबार पनि २० दिनको औषत भोल्युमभन्दा माथि आएको छ । यसले बजारले अब गति लिन सक्ने रिजालको आँकलन गर्न सकिन्छ ।’ अब टेक्निकल हेरेर कारोबार गर्नेहरु पनि सक्रिय हुने भएको कारण बजारले गति लिने उनको तर्क रहेको छ ।

 यो दिन नेप्सेमा सूचीकृत १३ वटै समूहमा हरियाली छाएको छ । आज होटल समूह सर्वाधिक अर्थात २.७७ प्रतिशतले बढ्यो । बैंकिङ समूह पनि आज १.६०, विकास बैंक २.३२,वित्त ०.३८,हाईड्रो २.०३,लगानी १.३६,जीवन बीमा १.८०,उत्पादन तथा प्रशोधन ०.९७,लघुवित्त १.५०,म्युचुअल फण्ड १.३३,निर्जीवन बीमा ३.६०,अन्य १.५७ र व्यापार समूह ०.३५ प्रतिशतले बढ्यो ।  

धेरै कारोबार गर्ने कम्पनीहरु

यो दिन समृद्धि फाइनान्सको सर्वाधिक सेयर कारोबार भएको छ । पिपुल्स हाईड्रोको १६ करोड ८० लाख,सप्तकोशी डेभलपमेन्ट बैंकको १४ करोड २२ लाख,जानकी फाइनान्सको १३ करोड ८५ लाख र साहस उर्जाको १२ करोड १८ लाख बढीको सेयर कारोबार भएको छ ।    

धरै कमाउने र गुमाउने कम्पनीहरु

आज नेप्सेमा कारोबार भएका ४ वटा कम्पनीको सेयरमूल्यमा सकारात्मक सर्किट लाग्यो । आज सप्तकोशी डेभलपमेन्ट बैंक, सानिमा जीआईसी इन्स्योरेन्स,कुथेली बुखरी स्मल हाईड्रोपावर र कर्पोरेट डेभलपमेन्ट बैंकको सेयरमूल्यमा अपर सर्किट लाग्यो ।

यो दिन सेन्ट्रल फाइनान्सको सेयरमूल्य सर्वाधिक घटेको छ । यो कम्पनीको सेयरमूल्य आज १.८८ प्रतिशतले घट्यो ।