दोहोरो अंकले घट्यो नेप्से, जानकार भन्छन्, ‘चाडपर्वका कारण बजारले लिएन गति’

काठमाण्डौ । साताको चौथो कारोबार दिन आज नेपाल स्टक एक्सचेञ्च (नेप्से) मा दोहोरो अंकको गिरावट आएको छ । आज नेप्से परिसूचक ०.५३ प्रतिशत अर्थात १४.४३ अंकले घटेर २ हजार ६७७.६२ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.५१ प्रतिशतले घटेर ४७८.८२ विन्दुमा सीमित बनेको छ । यो दिन नेप्सेमा सूचीकृत मध्ये ३०५ वटा स्क्रिप्टको १ करोड २० लाख ६९ हजार ८७८ कित्ता सेयर ५ अर्ब ९५ करोड ३९ लाख रुपैयाँभन्दा बढीको कारोबार भएको  छ ।

आजको बजारको विषयमा नेपाल इन्भेष्टर फोरमका उपाध्यक्ष राजन लम्सालले चाडपर्वको कारणले नै बजारले गति लिन नसकेको बताए । यसको साथै, अझै पनि केही ठूला लगानीकर्ता मन खोलेर सेयर नकिन्दा र कारोबारीले छिटो–छिटो कारोबार गर्दा बजारले गति लिन नसकेको उनको तर्क रहेको छ । ‘राजनीतिक माहोल पनि प्रष्ट नहुनु र पूँजीबजारलाई सरकारले नीतिगत रुपमा नै सम्बोधन हुन नसक्नुले बजारले गति नलिएको हो,’ उनले भने ।

त्यसैगरी अर्का बजार जानकार उपेन्द्र पाठकले सबै बैंक तथा वित्तिय संस्थाको रिपोर्ट राम्रै आएको तर सबै लगानीकर्ताहरुले त्यसलाई बुझ्न नसक्दा बजारले अहिले गति लिन नसकेको तर्क राखे । यद्यपी तिहारपछि भने बजारले गति लिनेमा पाठक बिश्वस्त देखिए ।

 यो दिन नेप्सेमा सूचीकृत १३ वटा समूहमध्ये ३ वटा बाहेक अन्य सबैमा रातो पोतियो । आज होटल समूहमा सर्वाधिक उछाल आयो । यो समूह आज २.५२ प्रतिशतले बढेर ६ हजार ८०३.८७ विन्दुमा पुग्यो ।  

निर्जीवन बीमा समूह पनि आज ०.४९ र व्यापार समूह ०.३२ प्रतिशतले बढ्यो ।  

बैंकिङ समूह आज ०.७२ प्रतिशत, विकास बैंक ०.४३,वित्त १.०१, हाईड्रो ०.३३, लगानी १.४१, जीवन बीमा ०.९८,उत्पादन तथा प्रशोधन ०.९६,लघुवित्त ०.१४,म्युचुअल फण्ड ०.७२ र अन्य समूह ०.७४ प्रतिशतले घट्यो ।  

धेरै कारोबार गर्ने कम्पनीहरु

यो दिन सिईडिबि हाईड्रोको सर्वाधिक सेयर कारोबार भयो । यो कम्पनीको आज ३४ करोड १७ लाख बढीको सेयर कारोबार भएको छ । यस्तै सानिमा जीआईको २६ करोड ५ लाख, सोल्टी होटलको २० करोड ९ड लाख, नेपाल फाइनान्सको १६ करोड ७७ लाख र स्ट्याण्डर्ड चाटर्ड बैंकको १५ करोड ७८ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ६ वटा कम्पनीको सेयरमूल्यमा सकारात्मक सर्किट लाग्यो । आज गुराँस लघुवित्त, मिड सोलु हाईड्रो,अपर स्याङ्गे हाईड्रो ,कुथेली बुखरी स्मल हाईड्रो, सानिमा जीआईसी र एक्सेल डेभलपमेन्ट बैंकको सेयरमूल्यमा अपर सर्किट लाग्यो ।  

यस्तै नेपाल फाइनान्सको सेयरमूल्य ७.१४ प्रतिशत,स्ट्याण्डर्ड चाटर्ड बैंकको ५.६५,बलेफि हाईड्रो ५.४६ र सोल्टी होटलको सेयरमूल्य ५.१३ प्रतिशतले बढ्यो ।  

आज जानकी फाइनान्सको सेयरमूल्य सर्वाधिक घट्यो । यो कम्पनीको सेयरमूल्य आज ४.९० प्रतिशतले घट्यो । एलआईसी नेपालको सेयरमूल्य पनि आज ४.८०, माथिल्लो मैलुङ खोला जलविद्युतको ४.५५ र माईखोला हाईड्रोको सेयरमूल्य ४.४५ प्रतिशतले घट्यो ।