चाडपर्व सकिएसँगै बजारले समात्यो लय, कारोबार २ महिना पछिकै उच्च

काठमाण्डौ । साताको पहिलो कारोबार दिन आज नेपाल स्टक एक्सचेञ्च (नेप्से) मा दोहोरो अंकको उछाल आएको छ । आज नेप्से परिसूचक २.३३ प्रतिशत अर्थात ६२.५४ अंकले बढेर २ हजार ७३८.०६ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि २.०७ प्रतिशतले बढेर ४८७.१० विन्दुमा पुगेको छ । यो दिन नेप्सेमा सूचीकृत मध्ये ३२५ वटा स्क्रिप्टको २ करोड २४ लाख ७४ हजार २८१ कित्ता सेयर ९ अर्ब ७७ करोड ११ लाख रुपैयाँभन्दा बढीको कारोबार भएको  छ ।

आजको कारोबार गत भदौ ३० पछिकै उच्च हो । त्यबेला १० अर्ब ३३ करोडबरारको कारोबार भएको थियो ।  

आजको बजारबारे अर्थशास्त्री सूर्यनारायण पौडेल भन्छन्,  ‘चाडपर्वको समाप्तीसँगै आज खुलेको बजारले सकारात्मक संकेत दिएको छ । आज कारोबार र भोल्युम पनि बढ्नुले यसलाई पुष्टि गरेको छ ।’

पौडेलका अनुसार तरलता फालाफाल भएको र अन्य क्षेत्रमा लगानी गर्ने विकल्प नभएको अवस्थामा पूँजी बजार अब सकारात्मक नै हुने देखिन्छ । ‘प्राविधिक रुपमा अब बजारले २७८२ विन्दुमा प्रतिरोध सामना गर्न सक्ने र त्यहाँभन्दा माथि लाग्यो भने बजारले राम्रो गति लिन सक्ने देखिन्छ,’ उनले भने ।  

अर्का बजार जानकार प्रकाश रजौरेले पनि चाडपर्वका कारण साइडवेजमा रहेको बजारमा करेक्सन सकिएको बताए । ‘राष्ट्र बैंकमा करिब ८ खर्ब लगानीयोग्य तरलता रहेको बेला ब्याजदर घट्दो अवस्थामा छ । त्यसैले राष्ट्र बैंकले आगामी समीक्षामा अझै केही लचक नीति अबलम्बन गर्न सक्ने देखिन्छ । जसको परिणाम स्वरुप बजारले ३२ सय विन्दु सहजै पार गर्नेछ,’ उनले भने ।  

प्राविधिक रुपमा पनि अब थर्ड वेभ चल्ने भएका कारण बजारले नयाँ उचाई हासिल गर्नेमा रजौरे ढुक्क देखिए ।        

यो दिन नेप्सेमा सूचीकृत १३ वटै समूहमा हरियाली छाएको छ । आज हाईड्रो  समूहमा सर्वाधिक उछाल आयो । यो समूह आज ४.२६ प्रतिशतले बढेर ३ हजार ५२०.१२ विन्दुमा पुग्यो ।  

यस्तै आज बैंकिङ समूह १.६२ प्रतिशत, विकास बैंक २.७१, वित्त २.४८,होटल ०.९६, होटल ०.९६,लगानी २.५६, जीवन बीमा २.१६,उत्पादन तथा प्रशोधन २.३२,लघुवित्त १.५१, म्युचुअल फण्ड ०.६२, निर्जीवन बीमा १.९५,अन्य २.५२ र व्यापार समूह १.१५ प्रतिशतले बढ्यो ।  

धेरै कारोबार गर्ने कम्पनीहरु

यो दिन सानिमा जीआईसी इन्स्योरेन्सको सर्वाधिक सेयर कारोबार भयो । यो कम्पनीको आज ३८ करोड ४ लाख बढीको सेयर कारोबार भयो । यस्तै समृद्धि फाइनान्सको ३४ करोड १९ लाख,ङादी ग्रुप पावरको २७ करोड ३ लाख र एचआईडीसीएलपीको १९ करोड ५६ लाख बढीको सेयर कारोबार भयो ।

धरै कमाउने र गुमाउने कम्पनीहरु

आज नेप्सेमा कारोबार भएका ६ वटा कम्पनीको सेयरमूल्यमा सकारात्मक सर्किट लाग्यो । आज गुराँस लघुवित्त,श्रृजनशिल लघुवित्त,सुपर मादी हाईड्रोपावर,बलेफि हाईड्रोपावर,नारायणी डेभलपमेन्ट बैंक र समृद्धि फाइनान्सको सेयरमूल्यमा अपर सर्किट लाग्यो ।  

यो दिन इष्टर्न हाईड्रोको सेयरमूल्य पनि ९.५० प्रतिशत,पिपुल्स पावरको ९.०७ र मैलुङखोला जलविद्युतको सेयरमूल्य पनि ९.०७ प्रतिशतले बढ्यो ।  

आज समाज लघुवित्तको सेयरमूल्यमा सर्वाधिक गिरावट आयो । यो कम्पनीको सेयरमूल्य ४.८६ प्रतिशतले ओरालो लाग्यो ।