बाढीपहिरोको क्षतिले रु.५० करोडको मोटर बीमा दाबी, हालसम्म १३.४२% मात्रै भुक्तानी

काठमाण्डौ । असोज महिनामा भीषण वर्षाले निम्त्याएको बाढीपहिरोका कारण एक हजार भन्दा बढी मोटर बीमाको दाबी परेको छ । नेपाल बीमा प्राधिकरणले उपलब्ध गराएको तथ्याङ्कअनुसार कात्तिक २० गतेसम्ममा बाढीपहिरोबाट क्षति पुगेको १ हजार २६९ वटा मोटर बीमाको दाबी परेको हो ।  

जसमा ९१३ वटा सवारी निजीतर्फ रहेका छन् भने ३५६ वटा सवारी सार्वजनिक रहेका छन् । प्राधिकरणका अनुसार २८४ वटा मोटर बीमाको भने दाबी भुक्तानी भइसकेको छ । जसमा २०७ वटा निजी मोटर र ७७ वटा सार्वजनिक मोटर गरी कुल २८४ वटा मोटर बीमाको दाबी भुक्तानी भएको प्राधिकरणले जनाएको छ ।  

कात्तिक २० गतेसम्ममा मोटर बीमातर्फ निजी र सार्वजनिक गरी कुल ५० करोड ९ लाख ३३ हजार रुपैयाँ बराबरको बीमा दाबी परेको हो । जसमा निजीतर्फ ३३ करोड २५ लाख रुपैयाँ र सार्वजनिकतर्फ १६ करोड ८४ लाख रुपैयाँ रहेको छ ।  

सञ्चालनमा रहेका १४ निर्जीवन बीमा कम्पनीहरुले कात्तिक २० गतेसम्ममा बाढीपहिरोबाट क्षति पुगेका मोटर बीमाको ६ करोड ७२ लाख ४३ हजार रुपैयाँ मात्रै दाबी भुक्तानी गरेको छ । जसमा निजी सवारीतर्फ ३ करोड २३ लाख ४८ हजार रुपैयाँ र सार्वजनिकतर्फ ३ करोड ४८ लाख ९४ हजार रुपैयाँ दाबी भुक्तानी भएको प्राधिकरणले जनाएको छ ।  

मोटर बीमातर्फ परेको दाबीमा हालसम्म निर्जीवन बीमकहरुबाट जम्मा १३.४२ प्रतिशत मात्रै बीमा दाबी भुक्तानी भएको छ ।  

बाढीपहिरोका कारण देशका विभिन्न स्थानमा धनजनको क्षति भएको छ । बीमा कम्पनीहरुमा बीमा दाबीको चाप बढ्दो छ । सम्पत्ति बीमा, इन्जिनियरिङ तथा ठेकेदार जोखिम बीमा, मोटर बीमा, सामुद्रिक बीमा, पशुपन्छी बीमा, कृषि बाली बीमा र विविध गरी कात्तिक २० गतेसम्ममा कुल ३ हजार ४६० वटा दाबीको १० अर्ब ५३ करोड २७ लाख रुपैयाँको दाबी परेको छ ।  

तर सो अवधिसम्म बीमा कम्पनीहरुले विभिन्न बीमालेखअन्तर्गत ६३७ वटा दाबीको मात्रै भुक्तानी गरेका छन् । बीमकहरुले ४७ करोड ११ लाख ५८ हजार रुपैयाँको मात्रै दाबी भुक्तानी गरेका छन् । जुन यो दाबी परेको कुल रकमको ४.७४ प्रतिशत मात्रै भुक्तानी रकम हो ।