कुथेली बुखरी स्मल हाइड्रोको सेयरमूल्य हालसम्मकै उच्च, कर्नरिङ्गको आशंका

काठमाण्डौ । कुथेली बुखरी स्मल हाइड्रो कम्पनीको सेयरभाउ हालसम्मकै उच्च पुगेको छ । आजको कारोबार पछि कम्पनीको सेयरमूल्य प्रतिकित्ता ३ हजार १ सय रुपैयाँ पुगेको छ । धैरै जस्तो जलविद्युत कम्पनीको सेयर भाउ २÷३ सयमा सीमित हुँदा यो कम्पनीको सेयर भाउले भने आकाश छोएको छ ।  

यसरी कम्पनीको सेयर भाउले आकाश छुनुमा कम्पनीको जादूमयी रिपोर्ट आउनु वा अन्य कुनै विशेष कारण छैन । यसरी कम्पनीको सेयरमूल्य उचालिनुमा कम्पनीको पूँजी कम हुनु वा लो क्याप हुनु नै प्रमुख कारण हो । यो कम्पनीको चूक्तापूँजी जम्मा १२ करोड १८ लाख ६७ हजार मात्रै रहेको छ ।  

सर्वसाधारणमा यस कम्पनीको करिब १० प्रतिशत अर्थात १ लाख १९ हजार कित्ता स्वामित्व रहेको छ । यही लो क्यापको फाइदा उठाँउदै  बजारमा  केही लगानीकर्ताहरुले चलखेल गरेको लगानीकर्ता टेकेन्द्र थपलियाले आरोप लगाए । ‘सेयर बजारमा प्रायः लो क्याप कम्पनीमा नै अधिक कर्नरिङ हुने गर्छ,’ थपलिया भन्छन्, ‘अझै अनौठो के छ भने धितोपत्र बोर्डले २५ करोड भन्दा तल पूँजी भएका एसएमई (साना तथा मझौला उद्योगलाई ) पूँजीबजारमा ल्याउने नियमावली अगाडी बढ्दै गर्दा लो क्याप कम्पनीहरु अहिले नै चुनौतिको रुपमा देखा परेका छन् ।’  

कम्पनीको प्रतिसेयर आम्दानी जम्मा १३ रुपैयाँ रहेको छ भने बुक भ्यालु १६२ रुपैयाँ मात्रै रहेको छ । तर सेयरको मूल्य भने ३ हजार १ सय पुग्नु  पर्ने कुनै कारण नरहेको र सेयर बजारमा खुलमखुला कर्नरिङ भएको पनि ती लगानीकर्ताले आरोप लगाए । ब्रोकर होल्डिङमार्फत हेर्दा यो कम्पनीको सेयर सन सेक्यूरटिज (स्टक ब्रोकर नम्बर ६४) बाट उच्च होल्डिङ रहेको छ । चार्टमार्फत नियाल्दा असोज महिनामा १७६० रुपैयाँ रहेको यो कम्पनीको सेयर डेढ महिनामा नै डबल पुग्न थालेको देखिन्छ ।

भदौ महिनामा ४७० बाट खुलेको यो कम्पनीको सेयरभाउ ३ महिनाको अन्तरालमा ६ गुणाले बढेको पनि ती लगानीकर्ताले बताए । ती लगानीकर्ताले थपे, ‘कम्पनीको सेयरको मूल्य बढ्नै हुन्न भन्ने त होइन तर केही महिनामै नै यसरी बढ्नुमा भने चलखेलको आशंका देखिन्छ । यसै विषयमा बुझ्न खोज्दा यस कम्पनी स्वतन्त्र सञ्चालक लक्ष्मण श्रेष्ठले यस बारेमा आफू यस विषयमा अनविज्ञ रहेको तर कुनै कम्पनीको सेयर मूल्यका बारेमा एकिन गरेर भन्न नसकिने प्रतिक्रिया दिए ।