मन्दाकिनी हाईड्रोपावर १८.१२% ले नाफा बढाउन सफल, कति छ ईपीएस ?

काठमाण्डौ । मन्दाकिनी हाईड्रोपावर कम्पनी लिमिटेडको आम्दानी र नाफामा सामान्य वृद्धि भएको छ । कम्पनीले सार्वजनिक गरेको चालु आवको पहिलो त्रैमाससम्मको अपरिष्कृत वित्तीय विवरणअनुसार कम्पनीको खुद नाफा २ करोड ८२ लाख रुपैयाँ रहेको छ । यो रकम अघिल्लो आवको तुलनामा १८.१२ प्रतिशतले बढी हो ।  

अघिल्लो आवको पहिलो त्रैमाससम्म कम्पनीले २ करोड ३९ लाख रुपैयाँबराबरको खुद नाफा कमाएको थियो ।  

कम्पनीले विद्युत बिक्रीमार्फत ४ करोड ४३ लाख रुपैयाँ आर्जन गरेको छ । यो रकम अघिल्लो आवको तुलनामा १.६९ प्रतिशतले बढी हुन आउछ । कम्पनीले यो अवधिमा ७६ लाख २८ हजार रुपैयाँबराबरको वित्त आम्दानी गरेको छ ।  

खर्च नियन्त्रण गर्न पनि कम्पनी सफल देखिएको छ । अघिल्लो आवको पहिलो त्रैमाससम्म १ करोड ७९ लाख रुपैयाँबराबरको कुल खर्च गरेको कम्पनीले समीक्षा अवधिसम्म भने १ करोड ६३ लाख खर्च गरेको छ ।  

६१ करोड ५९ लाख रुपैयाँबराबरको चुक्तापूँजी भएको कम्पनीले अन्य इक्वीटी शीर्षकमा ६ करोड ५३ लाख रुपैयाँ छुट्टाएको छ । कम्पनीको कुल चालु सम्पत्ति ११ करोड १२ लाख रुपैयाँ र कुल चालु दायित्व ६५ लाख ५६ हजार रुपैयाँ रहेको छ ।  

समीक्षा अवधिसम्म कम्पनीको प्रतिसेयर आम्दानी(त्रैमासिक)४.५९ रुपैयाँ, प्रतिसेयर नेटवर्थ ११०.६० रुपैयाँ र प्रतिसेयर कुल सम्पत्तिको मूल्य ११८.८७ रुपैयाँ कायम भएको छ ।