पूँजी बढाउन अघि सरे चार लघु बीमा कम्पनी, आइपीओ ल्याउन सेबोनसँग अनुमति

काठमाण्डौ । चार लघुबीमा कम्पनीले आइपीओ निष्कासनको अनुमति माग्दै नेपाल धितोपत्र बोर्ड (सेबोन)मा निवेदन दिएका छन् । गार्डियन माइक्रो लाइफ, क्रेष्ट माइक्रो लाइफ, नेपाल माइक्रो इन्स्योरेन्स र प्रोटेक्टिभ माइक्रो इन्स्योरेन्सले सेबोनसँग आइपीओ निष्कासनको लागि अनुमति मागेको हो ।  

नेपाल बीमा प्राधिकरणले लघुबीमा कम्पनीहरुलाई तत्काल आईपीओ जारी गरी चुक्तापुँजी बढाउन निर्देशन दिएसँगै लघुबीमकहरु आइपीओ निष्कासनको प्रक्रियामा अघि बढेका हुन् । प्राधिकरणले लघु बीमकहरुको पुँजी बृद्धि गर्न कायम चुक्तापुँजीको ३० प्रतिशत आइपीओ निष्कासन गर्न निर्देशन दिएको थियो ।  

सोही बमोजिम जीवनतर्फ दुई र निर्जीवन तर्फ २ लघुबीमा कम्पनीले धितोपत्र बोर्डमा आइपीओ निष्कासनको अनुमति माग्दै निवेदन दिएका हुन् ।  

सबै लघु बीमा कम्पनीले २२ करोड ५० लाख रुपैयाँबराबरको आइपीओ ल्याउन अनुमति मागेका छन् । बोर्डबाट अनुमति पाएपछि प्रत्येक लघुबीमा कम्पनीले १०० रुपैयाँ अंकित दरका २२ लाख ५० हजार कित्ता सेयर सर्वसाधारणमा जारी गर्नेछन् ।  

आइपीओ बिक्री प्रबन्धकमा गार्डियन माइक्रो लाइफले कुमारी क्यापिटल र बाँकी तीनवटाले एनएआईएमबि एस क्यापिटललाई नियुक्त गरेका छन् ।