ट्रिपल टप बनाएको बजारले के ‘बुल रिजेक्सन’ गर्दैछ ? ( साप्ताहिक बजार विश्लेषणसहित )

काठमाण्डौ । यो साता सेयर बजारमा ५ दिन सेयर कारोबार भयो । ५ दिनमा बजार ३ दिन बढ्यो भने २ दिन घट्यो  । अघिल्लो साता २ हजार ६८०.४९ विन्दुमा बन्द भएको बजार यो साता २ हजार ७४८.०५  मा बन्द भयो । यस हिसाबले यो साता समग्रमा बजार ६७.५६ अंकले बढ्यो । अघिल्लो साता ६८.३४ अंकले बजार घटेको थियो  ।

यो साता ५ दिनको कारोबारमा ३९ अर्ब ३८ करोड रुपैयाँबराबरको कारोबार भयो । अघिल्लो साता चार कारोबार दिनमा  ३७ अर्ब ५४ करोड रुपैयाँबराबरको कारोबार भएको थियो । यस हिसाबले यो साता बजार बढ्दा सेयर कारोबार र सूचक दूबै  बढ्यो । यो साता नेप्सेमा बजार पूँजीकरण ४५ खर्ब ५६ अर्ब रुपैयाँ पुग्यो । यस्तो बजार पूँजीकरण अघिल्लो साता ४२ खर्ब ६३ अर्ब रहेको थियो । यस हिसाबले यो साता बजार बढ्दा र बिशाल बजार कम्पनीको संस्थापक सेयर लिष्टिङ हुँदा बजार पूँजीकरण २ खर्ब ९३ अर्बले बढ्यो ।  

 

प्राविधिक पक्षः  

प्राविधिक रुपमा पछिल्लो अवस्था नियाल्दा बजार साइडवेज नै चलेको देखिन्छ । प्राइस एक्सनबाट नियाल्दा बजारले माथिल्लो प्रतिरोध २७८० विन्दुलाई ब्रेक गरेर हायर हाई बनाएको पनि छैन । तल्लो टे«न्डलाईन २६६० विन्दुलाई पनि ब्रेक डाउन गरेर बजारले क्यारेक्टर चेन्ज पनि गरेको छैन । यस अर्थ बजारमा लगानीकर्ता पर्ख र हेरको अवस्थामा रहको देखिन्छ । पछिल्लो बजारले ट्रिपल टप बनाएको छ । यसले बजारमा बुल रिजेक्सन हुँदै गरेको भन्ने हो । तर यसको निश्चितताको लागि भने बजारले बाटो परिवर्तन गरेर ‘एम’ आकार नै बनाउनु पर्छ । त्यो अहिले बनिसकेको अवस्था छैन । यसर्थ यो साता २७४८ मा बन्द भएको बजार यदि आगामी साता यो भन्दा तल खस्छ भने २७०० विन्दुसम्म आउन पनि सक्छ । जसलाई भनेको सामान्य करेक्सनकै रुपमा लिन सकिन्छ । 

बोलिङ्गर ब्याण्ड , म्याक्डी र आरएसआई  

साप्ताहिक रुपमा बोलिङ्गर ब्याण्डबाट नियाल्दा बजारले पछिल्लोपटक ३ हजारबाट तल खसेता पनि मध्य ब्याण्डमा बलियो सपोर्ट लिएको देखिन्छ । म्याक्डीमा वियरिस क्रसओभर बनेता पनि हिस्टोग्राम फिक्का र छोटा–छोटा हुँदै गएका छन् । आरएसआई ६० को तहमा चलेको छ । समग्रमा तीन वटै इन्डिकेटरबाट नियाल्दा बजार बुल नै चलेको देखिन्छ ।  

पिभट् प्वइन्ट  

पिभट् विश्लेषणमार्फत सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ – ३०७३

प्रतिरोध २ – २९२७

प्रतिरोध १–  २८०२

पिभट् प्वइन्टः २६५६

घटेमा सपोर्ट  

सपोर्ट १– २५३१

सपोर्ट २– २३८५

सपोर्ट  ३ –२२६६

निष्कर्षः यो साता नेप्से करिब ६८ अंकले बजार बढ्दा कारोबार पनि बढ्यो । साप्ताहिक रुपमा बजारलाई बोलिङ्गर ब्याण्डबाट नियाल्दा बजार मध्य ब्याण्ड भन्दा माथि छ । आरएसआई पनि ६० भन्दा माथि नै चलको देखिन्छ । मूभिङ एभरेजबाट नियाल्दा पनि बजार ५० दिने मूभिङ एभरेज भन्दा माथि नै चलेको देखिन्छ । कारोबार तथा भोल्युमबाट नियाल्दा पनि बजारमा दैनिक औषत ९ अर्ब बराबरको कारोबार भएको छ । नेपाल राष्ट्र बैंकको समीक्षा धेरै लचक नआएता पनि धेरै कसिलो पनि आएको छैन । यसकाराण आगामी साता एक दुई कारोबारमा बजारमा करेक्सन आए पनि बजार सम्हालिएर माथिकै यात्रातर्फ लाग्छ सक्छ । पछिल्लो बजारले ट्रिपल टप बनाएको भएता पनि अहिले नै बुल रिजेक्सन हुँदै गरेको निचोड निकाल्न भने हतार हुन सक्छ ।  

नोटः सेयर बजारमा लगानी जोखिमपूर्ण हुन्छ । यो विश्लेषण कारोबारका लागि सिफारिस भने होइन ।