कारोबार र सूचक दुवैमा सुधार,‘बजार परिपक्व बन्दै’

काठमाण्डौ । साताको दोस्रो कारोबार दिन आज नेपाल स्टक एक्सचेञ्च (नेप्से) दोहोरो अंकले बढेको छ । आज नेप्से परिसूचक ०.७२ प्रतिशत अर्थात १९.९७ अंकले बढेर २ हजार ७५८.०४ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.३१ प्रतिशतले बढेर ४७१.७९ विन्दुमा पुगेको छ । यो दिन नेप्सेमा सूचीकृत मध्ये ३१४ वटा स्क्रिप्टको २ करोड ३० लाख ११ हजार ३६१ कित्ता सेयर १० अर्ब ५४ करोड १७ लाख रुपैयाँभन्दा बढीको कारोबार भएको  छ ।

अघिल्लो दिन भने ८ अर्ब ८३ करोडबराबरको कारोबार भएको थियो ।  

आजको बजारबारे बजार जानकार अजयसिंह थापा(जयशम्भु)भन्छन्,‘बजारले मौद्रिक नीतिको समीक्षा पछिको सबै समाचारलाई पचाएको देखिन्छ । अहिले सेक्टर रोटेशन हुँदै बजार चलिरहेको छ । यद्यपी बजारले २७८० को विन्दुलाई भने ब्रेक गर्न सकेको छैन ।’

थापाले सबै नकारात्मक खबर सकिएकाले अब अधिक सम्भावना माथि कै रहेको बताए । उनले बीमा र बैंकिङ क्षेत्र चले नेप्से ३ हजार विन्दुमाथि पुग्ने समेत दाबी गरे ।  

अर्का बजार जानकार निमानन्द कंडेलले पनि सबै नकारात्मक समाचारहरुलाई बजारले पचाएकाले बजार परिपक्व भएको बताए । ‘लगानीकर्ता अहिले चुनावी नतिजाको प्रतिक्षामा समेतका कारण पुस मसान्तसम्म बजार माथि नै जाने देखिन्छ ’ उनले भने ।  

हाई क्याप चल्न नसक्दा र ट्रेडरले लो क्याप भएका कम्पनी मात्रै चलाउदा बजारले २७८५ को प्रतिरोध ब्रेक गर्न नसकेको उनले बताए ।  

 

यो दिन नेप्सेमा सूचीकृत १३ वटा समूहमध्ये ४ वटा बाहेक अन्य सबैमा हरियाली छायो । आज व्यवसाय समूहमा सर्वाधिक उछाल आयो । यो समूह आज ९.७० प्रतिशतले बढेर ५ हजार ६०.५८ विन्दुमा पुग्यो ।  

यस्तै आज होटल समूह ४.९९, हाईड्रो ०.६२,लगानी ०.६०,जीवन बीमा १.९१,उत्पादन तथा प्रशोधन ०.१५,लघुवित्त ०.१५,म्युचुअल फण्ड ०.४१ र निर्जीवन बीमा समूह ०.२० प्रतिशतले बढ्यो ।  

यो दिन बैंकिङ समूह ०.५९ प्रतिशत,विकास बैंक १.७२, वित्त समूह १.९७ र अज्य समूह ०.३६ प्रतिशले घट्यो ।  

धेरै कारोबार गर्ने कम्पनीहरु

यो दिन नेपाल फाइनान्सको सर्वाधिक सेयर कारोबार भयो । आज यो कम्पनीको ५९ करोड ४७ लाख बढीको कारोबार भयो । ङादी ग्रुप पावरको आज ४८ करोड ८९ लाख,जानकी फाइनान्सको २७ करोड ५१ लाख,एनआरएन इन्फ्रास्ट्रक्चरको २४ करोड २४ लाख र एक्सेल डेभलपमेन्ट बैंकको २१ करोड ७१ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ५ वटा कम्पनीको सेयरमूल्यमा सकारात्मक सर्किट लाग्यो । आज तारागाँउ रिजेन्सी होटल,विशाल बजार,खानीखोला हाईड्रो,जोशी हाईड्रो र अपर स्याङ्गे हाईड्रोको सेयरमूल्यमा अपर सर्किट लाग्यो ।  

यस्तै एलआईसी नेपालको सेयरमूल्य ९.३६ प्रतिशत,अपर लोहरे खोलाको ९.१९ र ओरियण्टल होटलको सेयरमूल्य ७.८० प्रतिशतले बढ्यो ।  

यो दिन नेपाल फाइनान्सको सेयरमूल्य सर्वाधिक अर्थात ८.७२ प्रतिशतले घट्यो । गुराँल लघुवित्तको सेयरमूल्य पनि आज ७.७३,विन नेपाल लघुवित्तको ६.०३ र सामुदायिक लघुवित्तको सेयरमूल्य ४.७६ प्रतिशतले घट्यो ।