आम्दानीमा सुधार हुँदा पनि नेपाल वेयरहाउजिङ अझै २.२४ करोड घाटामा

काठमाण्डौ । नेपाल वेयरहाउजिङ कम्पनी लिमिटेडले चालु आवको पहिलो त्रैमासको अपरिष्कृत वित्तीय विवरण सार्वजनिक गरेको छ । जसअनुसार कम्पनी २ करोड २४ लाख रुपैयाँ घाटामा रहेको छ ।  

अघिल्लो आवको उक्त अवधिसम्म पनि कम्पनी २ करोड ९९ लाख रुपैयाँ घाटामा रहेको थियो । कम्पनीको आम्दानी बढ्दा घाटामा २९.०५ प्रतिशतको कमी आएको छ ।  

समीक्षा अवधिमा कम्पनीले ९३ लाख १६ हजार रुपैयाँ आम्दानी गरेको छ । जुन रकम अघिल्लो आवको सोही अवधिमा कम्पनीले आर्जन गरेको तुलनामा ९३१ प्रतिशतले बढी हो । अघिल्लो आवमा कम्पनीको आम्दानी ९ लाख ८ हजार रुपैयाँ थियो ।  

यो अवधिमा कम्पनीको वित्त खर्च भने बढेको छ । अघिल्लो आवमा ७१ लाख ४९ हजार रुपैयाँ रहेको कम्पनीको वित्त खर्च बढेर १ करोड ५५ लाख रुपैयाँ पुगेको छ । यस्तै कम्पनीको प्रत्यक्ष सञ्चालन खर्च ३४ लाख १५ हजार, कर्मचारी खर्च ३२ लाख ७१ हजार र अन्य खर्च १५ लाख ४ हजार रुपैयाँ रहेको छ ।  

६८ करोड ७५ लाख रुपैयाँ चुक्तापूँजी भएको कम्पनीको कुल चालु सम्पत्ति १० करोड ४८ लाख र कुल चालु दायित्व ४ करोड ६७ लाख रुपैयाँ रहेको छ ।  

कम्पनीको प्रतिसेयर आम्दानी(ईपीएस)४.१२ रुपैयाँले ऋणात्मक, मूल्य आम्दानी अनुपात २५२.४६ गुणा ऋणात्मक र प्रतिसेयर नेटवर्थ ८५.२५ रुपैयाँ ऋणात्मक रहेको छ ।  

आर्थिक वर्ष २०८१÷८२ को अन्त्यमा कम्पनीले निर्माण गरेका सुनसरी इकाईको १५ हजार मेट्रीक टनबराबरको ३ वटै साइलो र पर्सा इकाईको २५ हजार मेट्रीक टनबराबरको ४ मध्य ४ वटा साइलोमा भण्डारण कार्यको सुरुवात भएको कम्पनीले जनाएको छ । कपिलवस्तुको १५ हजार मेट्रीक टनको ३ वटा साइलो निर्माण सम्पन्न हुने क्रममा रहेका छन् र आगामी सिजनमा भण्डारण सुरुवात गर्ने तयारी कम्पनीको छ । यी साइलोको निर्माण पश्चात कम्पनीको आय सोहि हिसाबले वृद्धि हुने कम्पनीको विश्वास छ ।