नेप्सेमा उच्च अंकको गिरावट, जानकार भन्छन्, ‘लगानीकर्ता अफवाहको पछि लाग्नु मुख्य कारण’

नेप्सेमा उच्च अंकको गिरावट, जानकार भन्छन्, ‘लगानीकर्ता अफवाहको पछि लाग्नु मुख्य कारण’

काठमाण्डौ । साताको पहिलो कारोबार दिन आज नेपाल स्टक एक्सचेञ्च (नेप्से) दोहोरो अंकले घटेको छ । आज नेप्से परिसूचक  १.६७ प्रतिशत अर्थात ४५.९३ अंकले घटेर २ हजार ६८९ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि १.५० प्रतिशतले घटेर ४५७.०४ विन्दुमा झरेको छ । यो दिन नेप्सेमा सूचीकृत मध्ये ३२१ वटा स्क्रिप्टको १ करोड ७३ लाख ९२ हजार २४४ कित्ता सेयर ७ अर्ब ४६ करोड ३ लाख रुपैयाँभन्दा बढीको कारोबार भएको  छ ।

आजको बजारबारे नेपाल इन्भेष्टर्स फोरमका निवर्तमान अध्यक्ष छोटेलाल रौनियार भन्छन्,  ‘ आज बजार घट्नुमा मुख्यतः दुई तीन वटा कारण छन् । पहिलो भनेको अर्थमन्त्री परिपर्तनको अफवाहका कारण बजार घट्न पुगेको छ । यस्तै मौद्रिक नीतिको समीक्षामा कुनै पनि फेरबदल नहुँदा निराश भएका लगानीकर्ताले आज बिक्री बढाउँदा समेत बजार घटेको छ । ’

बजार बढ्दा मात्तिने र घट्दा आत्तिने प्रवृत्तिले बजारमा दबाब आएको उनले बताए । ‘यद्यपी बजारमा पैसा फालाफाल र ब्याजदर सस्तो रहुन्जेल डराउनु पर्दैन,’ उनले भने ।  

यस्तै सेयर लगानीकर्ता संघ नेपालका कार्यवाहक अध्यक्ष तारा फुल्लेलले पनि आज सामाजिक सञ्जालमा फैलिएको सरकार हेरफेर हुन सक्ने हल्ला र लगानीकर्ताले घाटामै सेयर बेच्दा बजार घट्न पुगेको बताए । ‘ यद्यपी बजार बुल ट्रण्डमै रहेको छ । धितोपत्र बोर्डमा नयाँ अध्यक्ष आएका छन् र गभर्नर पनि नयाँ आउँदै गरेकाले बजार बिस्तारै फर्कन सक्छ,’ उनले बताए ।    

यो दिन नेप्सेमा सूचीकृत १३ वटै समूहमा रातो पोतियो । आज जीवन बीमा समूह सर्वाधिक अर्थात ३.०७ प्रतिशतले घट्यो । यस्तै बैंकिङ समूह १.८६ प्रतिशत, विकास बैंक १.०४, वित्त १.८४,होटल १.८१,हाईड्रो १.९८, लगानी १.३३ उत्पादन तथा प्रशोधन ०.३२, लघुवित्त १.५०, म्युचुअल फण्ड ०.५९, निर्जीवन बीमा ०.८३, अन्य ०.८१ र व्यापार समूह २.१३ प्रतिशतले घट्यो ।  

धेरै कारोबार गर्ने कम्पनीहरु

यो दिन एनआरएन इन्फ्रास्ट्रक्चरको सर्वाधिक सेयर कारोबार भयो । आज यो कम्पनीको ३२ करोड ६४ लाख बढीको कारोबार भयो । नेपाल फाइनान्सको आज १५ करोड ६८ लाख, रिभर फल्स पावरको १५ करोड ६५ लाख,खानीखोला हाईड्रोपावरको १३ करोड ७८ लाख र वेष्ट फाइनान्सको १२ करोड ९९ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएको एउटा मात्रै कम्पनीको सेयरमूल्यमा अपर सर्किट लाग्यो । आज खानीखोला हाईड्रोपावरको सेयरमूल्य ९.९८ प्रतिशतले बढ्यो ।  

यस्तै दोल्ती पावर कम्पनीको सेयरमूल्य ८.७७ प्रतिशत,स्वाभिमान लघुवित्तको ७.८९ र मोलुङ हाईड्रोपावरको सेयरमूल्य ६.५० प्रतिशतले बढ्यो ।  

आज नेप्सेमा कारोबार भएका ४ वटा कम्पनीको सेयरमूल्यमा लोअर सर्किट लाग्यो । आज मानुषी लघुवित्त,एलआईसी नेपाल र जोशी हाईड्रोपावरको सेयरमूल्यमा लोअर सर्किट लाग्यो ।  

यस्तै आज दिव्यश्वरी हाईड्रोपावरको सेयरमूल्य ७.०९ प्रतिशत र सुपर माई हाईड्रोको सेयरमूल्य ६.८८ प्रतिशतले घट्यो ।