सोपान फर्मास्युटिकल्सको २.९६ लाख कित्ता अवितरित हकप्रद सेयर बिक्रीमा, सर्वसाधारणले आवेदन दिन पाउने

काठमाण्डौ । सोपान फर्मास्युटिकल्स लिमिटेडले संस्थापक समूहको अवितरित हकप्रद सेयर बिक्रीमा राखेको छ । कम्पनीले आजदेखि २ लाख ९६ हजार १२२ कित्ता अवितरित हकप्रद सेयर बिक्रीमा राखेको हो ।  

यो सेयर खरिदका लागि कम्पनीका विद्यमान संस्थापक सेयरधनीहरु साथै अन्य व्यक्ति तथा संस्थाले खरिद आवेदन दिन सक्नेछन् ।  

कम्पनीले गत भदौ २५ गते सम्पन्न साधारण सभाबाट पारित भए बमोजिम असोज १४ गतेसम्म कायम सेयरधनीहरुलाई ३० प्रतिशतले हुन आउने प्रतिसेयर अंकित मूल्य रु.१०० दरका २९ लाख ७० हजार कित्ता हकप्रद साधारण सभा जारी गरेको थियो । जसमा २६ लाख ७३ हजार ८७८ कित्ता हकप्रद सेयर खरिदका लागि आवेदन परेको थियो ।  

कम्पनीको मंसिर १७ गते बसेको सञ्चालक समितिको बैठकले रितपूर्वक आवेदन दिने आवेदकलाई २६ लाख ७३ हजार ८७८ कित्ता हकप्रद सेयर बाँडफाँड गर्ने निर्णय गरेको थियो । सोहीमध्येको बिक्री हुन बाँकी रहेको हकप्रद सेयर कम्पनीले बिक्रीमा राखेको हो ।  

लगानीकर्ताले हकप्रद सेयर खरिदका लागि पुस ३ गतेसम्म आवेदन दिन सक्नेछन् । प्रतिसेयर न्यूनतम मूल्य १०० रुपैयाँ तोकिएको यो सेयर खरिदका लागि न्यूनतम १ हजार कित्ता र अधिकतममा १ लाख कित्ताका लागि आवेदन दिन सकिनेछ । यस्तो आवेदन काठमाण्डौको तीनकुनेमा रहेको कम्पनीको कर्पोरेट कार्यालयमा दिनु पर्नेछ ।