निर्जीवन बीमकको विभिन्न क्षेत्रमा रु.६७.३४ अर्ब लगानी, मुद्दतीमा मात्रै ८१.१५%

काठमाण्डौ । निर्जीवन बीमा कम्पनीहरुले विभिन्न क्षेत्रमा ६७ अर्ब भन्दा बढी लगानी गरेका छन् । चालु आवको पहिलो त्रैमाससम्ममा १४ निर्जीवन बीमकले विभिन्न क्षेत्रमा ६७ अर्ब ३४ करोड ४ लाख रुपैयाँ लगानी गरेका हुन् ।  

यो लगानी गत आवको सोही अवधिसम्मको तुलनामा ११.२८ प्रतिशत बढी हो । गत आवको पहिलो त्रैमाससम्म निर्जीवन बीमकहरुले विभिन्न क्षेत्रमा ६० अर्ब ५१ करोड ३४ लाख रुपैयाँ लगानी गरेका थिए ।  

निर्जीवन बीमा कम्पनीहरुले सर्वाधिक बैंक तथा वित्तीय संस्थाको मुद्दती निक्षेपमा लगानी गरेका छन् । पहिलो त्रैमाससम्ममा निर्जीवन बीमकको मुद्दती निक्षेपमा मात्रै ५३ अर्ब १० करोड ४१ लाख रुपैयाँ लगानी रहेको छ । जुन यो कुल लगानीको ८१.१५ प्रतिशत रकम हो ।  

कम्पनीहरुले सो अवधिसम्ममा वाणिज्य बैंकहरुको मुद्दती निक्षेपमा ४६ अर्ब ४१ करोड, विकास बैंकको मुद्दती निक्षेपमा ५ अर्ब ४५ करोड रुपैयाँ र वित्त कम्पनीहरुको मुद्दती निक्षेपमा १ अबृ २३ करोड रुपैयाँ लगानी गरेका छन् ।  

यसरी निर्जीवन बीमा कम्पनीहरुको ८० प्रतिशत भन्दा बढी लगानी मुद्दती निक्षेपमा मात्रै केन्द्रित रहेको छ । नेपाल बीमा प्राधिकरणले बीमा कम्पनीहरुलाई लगानी विविधिकरण गर्न निर्देशन दिएपनि बीमकहरु मुद्दती निक्षेपतिर नै लगानी गर्न बढी केन्द्रित छन् ।  

अन्य सेक्टरमा भन्दा मुद्दती निक्षेपमा लगानी गर्दा रिस्क कम हुने र केही प्रतिशत भएपनि ब्याजदरको रुपमा रिटर्न आउने भएकाले बीमकहरु यस्तो क्षेत्रमा बढी लगानी गर्न केन्द्रित भएका हुन् । प्राधिकरणले लगानी विविधिकरण गर्न निर्देशन दिएपनि बीमा कम्पनीहरु भने घरजग्गा कारोबार, शिक्षा तथा स्वास्थ्य र हाइड्रोपावर जस्ता अन्य क्षेत्रहरुमा लगानी बढाउन सकेका छैनन् । यस्ता क्षेत्रमा लगानी गर्दा बढी जोखिम हुने बीमकहरुको भनाई छ ।  

त्यस्तै, दोस्रो बढी लगानी सूचीकृत पब्लिक कम्पनीको सेयर (सेयरबजार)मा लगानी रहेको छ । यस्तो क्षेत्रमा निर्जीवन बीमकको कुल लगानी ४ अर्ब ६ करोड रुपैयाँ लगानी रहेको छ । यो रकम गत आवको सोही अवधिसम्मको तुलनामा २८.४२ प्रतिशत बढी हो । गत आवको पहिलो त्रैमाससम्म निर्जीवन बीमकको सेयरबजारमा ३ अर्ब १६ करोड रुपैयाँ लगानी रहेको थियो ।  

यसका साथै बैंकको अग्राधिकार सेयर बण्ड, डिबेञ्चर र ऋणपत्रमा भने ३ अर्ब ८ करोड रुपैयाँ लगानी रहेको छ । यता निर्जीवन बीमकको अन्य लगानी २ अर्ब २९ करोड रुपैयाँ छ ।  

अन्य संस्थापक सेयरमा निर्जीवन बीमा कम्पनीहरुको लगानी १ अर्ब ४२ करोड रुपैयाँ रहेको छ भने सूचीकृत पब्लिक कम्पनीको बण्ड र डिबेञ्चरमा १ अर्ब १४ करोड रुपैयाँ लगानी रहेको छ ।  

त्यस्तै, कृषि उत्पादन, उद्योग, जलविद्युत, शौय, केबुलकार, शिक्षा तथा स्वास्थ्य जस्ता क्षेत्रमा निर्जीवन बीमा कम्पनीहरुको लगानी ९९ करोड १६ लाख रुपैयाँ, नागरिक लगानी कोष र म्युचुअल फण्डमा ७२ करोड ८ लाख रुपैयाँ, नेपाल राष्ट्र बैंकको बचतपत्रमा २१ करोड ५३ लाख रुपैयाँ, इन्भेष्टमेन्ट कम्पनीको सेयरमा १५ करोड १२ लाख रुपैयाँ र सूचीकृत नभएका अन्य पब्लिक कम्पनीको सेयरमा १४ करोड २० लाख रुपैयाँ लगानी रहेको छ ।