आरएसडिसी लघुवित्तको नाफा र खुद ब्याज आम्दानी दुवै घट्यो, ईपीएस कति ?

काठमाण्डौ । आरएसडिसी लघुवित्त वित्तीय संस्था लिमिटेडले चालु आर्थिक वर्ष २०८१/८२ को दोस्रो त्रैमासको वित्तीय विवरण सार्वजनिक गरेको छ। जसअनुसार संस्थाले ४ करोड ४१ लाख रुपैयाँ खुद नाफा आर्जन गरेको छ । यो नाफा अघिल्लो आवको सोही अवधिको तुलनामा ३६.२५ प्रतिशतले कम हो । अघिल्लो आवको दोस्रो त्रैमाससम्म संस्थाले ६ करोड ९३ लाख खुद नाफा कमाएको थियो ।  

संस्थाको खुद ब्याज आम्दानी पनि घटेको छ । संस्थाले समीक्षा अवधिसम्म ११ करोड २१ लाख खुद ब्याज आम्दानी गरेको छ । जुन अघिल्लो आवको सोही अवधिको तुलनामा ८.११ प्रतिशतले कम हो । गत आवको दोस्रो त्रैमाससम्म संस्थाले १२ करोड २० लाख खुद ब्याज आम्दानी गरेको थियो । संस्थाको खुद सञ्चालन आम्दानी पनि ३०.४८ प्रतिशतले घटेर ८ करोड ८० लाख रुपैयाँमा सीमित बनेको छ ।  

समीक्षा अवधिसम्म संस्थाले कर्मचारीका लागि १ करोड ७६ लाख रुपैयाँ र अन्य सञ्चालन खर्च ४५ लाख ९४ हजार रुपैयाँबराबर खर्च गरेको छ । यो अवधिमा संस्थाको रिटेन्ड अर्निङ भने ३४.७४ प्रतिशतले बढेर १३ करोड ११ लाख रुपैयाँ पुगेको छ । यस्तै संस्थाको रिजर्भको आकार १६ करोड ४५ लाख रुपैयाँबाट बढेर १७ करोड ३७ लाख रुपैयाँ पुगेको छ ।  

दोस्रो त्रैमाससम्म संस्थाले २ करोड ६० लाख रुपैयाँ इम्पेयरमेन्ट चार्जका लागि छुट्टाएको छ । संस्थाको खराब कर्जा अनुपात १.८१ प्रतिशतबाट बढेर २.७१ प्रतिशत कायम भएको छ ।  

समीक्षा अवधिसम्म संस्थाको प्रतिसेयर आम्दानी(ईपीएस) ९.३६ रुपैयाँ, प्रतिसेयर कुल सम्पत्तिको मूल्य ७८७.३९ रुपैयाँ, पीई रेसियो ७१.६१ गुणा, तरलता अनुपात १३.७२ प्रतिशत र प्रतिसेयर नेटवर्थ १३२.२९ रुपैयाँ कायम भएको छ ।