एचआईडीसीएलको सेयर ‘बुलिस सेन्टिमेन्टमा’ चल्दै, कति सम्म पुग्ला भाउ ?

काठमाण्डौ । हाईड्रो इलेक्ट्रिसिटी इन्भेष्टमेन्ट एण्ड डेभलपमेन्ट कम्पनी (एचआईडीसीएल) नेपाल स्टक एक्सेञ्ज(नेप्से)को लगानी उपसमूहमा सूचीकृत कम्पनी हो । यो कम्पनीको स्थापना सन् २०११ मा भएको हो । यो कम्पनीमा नेपाल सरकार अर्थ मन्त्रालय , नागरिक लगानी कोष, उर्जा तथा जलस्रोत मन्त्रालय र राष्ट्रिय बीमा संस्थान जस्ता सरकारी निकायहरु संस्थापक सेयर होल्डरका रुपमा रहेका छन् ।  

यो कम्पनीमा नेपाल सरकारको ५० प्रतिशत , सर्वसाधारण सेयरधनीको २० प्रतिशत, अन्य संस्थापक सेयरधनीको १५ प्रतिशत र कर्मचारी सञ्चय कोष , नागरिक लगानी कोष र राष्ट्रिय बीमा संस्थानहरुको ५/५ प्रतिशत सेयर स्वामित्व रहेको छ ।  

आधाभूत पक्षः  

यस आर्थिक वर्षको दोस्रो त्रैमासिक प्रतिवेदनअनुसार कम्पनीको चूक्तापूँजी २४ अर्ब ५६ करोड , जगेडा कोष ३ अर्ब ४७ करोड , खुद मुनाफा ५२ करोड २२ लाख रुपैयाँ रहेको छ । कम्पनीको कुल पूँजी २८ अर्ब रुपैयाँ रहेको छ । कम्पनीको प्रतिसेयर आम्दानी(ईपीएस)४.२५ रुपैयाँ र नेटवर्थ ११४ रुपैयाँ रहेको छ । कम्पनीको रिर्टन अन इक्विटी ३.७३ प्रतिशत रहेको छ । कम्पनीको ८ वर्षको वार्षिक औषत लाभांशदर करिब ७ प्रतिशत रहेको छ ।  

प्राविधिक पक्षः  

इलिअट वेभ

इलिअट वेभमा विभिन्न डिग्रीहरु हुने गर्छन् । त्यस्ता डिग्रीहरुले सानाठूला गरेर एक दिनदेखि एकसय वर्षसम्मको समय अवधिलाई प्रतिनिधित्व गर्छन् । इलिअट वेभमा मूल्य माथि जान पाँच फरक÷फरक वेभ हुन्छन् भने तल जान ३ वेभ हुन्छन् ।  

माथि लाग्ने पाँच वेभमा पनि तीनवटा बढोत्तरीका र २ वटा सुधारका देख्न सकिन्छ । यसमा १, ३, ५ बढोत्तरीको हुन्छ भने २ र ४ करेक्सनको हुन्छ । वेभ ५ को करेक्सन वेभ ‘ए’ हो । वेभ ‘ए’, ‘बी’, ‘सी’ले मूल्य तथा सूचक तल जाने संकेत दिन्छ ।

कम्पनीले पछिल्लो समय बनाएको चक्रको आधारमा नियाल्दा पहिलो वेभमा १५९ देखि २१२ सम्म वेभ १ , वेभ २ मा करेक्सन भएर १७० सम्म, वेभ ३ मा तीव्र बढोत्तरीका साथ ३४१ सम्म र वेभ ४ मा २३५ सम्म करेक्सन भएको देखिन्छ । त्यसपछि अब वेभ पाँचमा बढोत्तरीका साथ अब आउने बुलमा यो कम्पनीको सेयर भाउ प्रतिकित्ता ४४४ रुपैयाँसम्म पुग्न सक्छ ।  

फियर एण्ड ग्रिड इन्डेक्सको आधारमा  

फियर एण्ड ग्रिड इन्डेक्सको आधारमा यो कम्पनी हाल ७० को तहमा बुलिस सेन्टिेमन्टमा चलेको देखिन्छ । कम्पनीको ५२ साताको उच्च मूल्य ३४४ रुपैयाँ रहेको छ भने न्यून मूल्य १५८ रुपैयाँ रहेको छ । कम्पनीमा ८० प्रतिशत सेयर स्वामित्व संस्थागत र २०  प्रतिशत सर्वसाधारणतर्फ रहेको छ ।

बोलिङ्गर ब्याण्ड

बोलिङ्गर ब्याण्डको आधारमा यो कम्पनीको सेयर भाउ हाल अपर ब्याण्डमा चलको छ । म्याक्डीमा यस अघिनै बुलिस क्रसओभर बनेको छ । हिस्टोग्राम सकारात्मक र लामा–लामा हुँदै गएको देखिन्छ । आरएसआई ओभर बट जोन ७० को तहमा पुगेको छ । यसले कम्पनीको सेयर भाउ बुलिस बन्दै गरेको बुझिन्छ ।  

पिभट् प्वइन्टः  

पिभट् विश्लेषणमार्फत सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ –३०६

प्रतिरोध २ – २८५

प्रतिरोध १–२६७

पिभट प्वइन्टः२४६

घटेमा सपोर्ट  

सपोर्ट १– २२७

सपोर्ट २– २०६

सपोर्ट  ३ –१८८

निष्कर्षः दोस्रो बजारमा यो कम्पनी उच्च पूँजी भएको कम्पनी मानिन्छ । कम्पनीको चुक्तापूँजी झण्डै २५ अर्ब पुगिसकेको छ । तर पूँजी अनुसारको कम्पनीको खुद मूनाफा तथा प्रतिसेयर आम्दानी र रिर्टन अन इक्विटीमा सुधार भएको देखिदैन । कम्पनीको जगेडा कोषमा भने ८३ प्रतिशतले बढोत्तरी भएको देखिन्छ । प्राविधिक रुपमा फियर एण्ड ग्रिड मिटरमा बुलिस सेन्टिमेन्टमा चलेको देखिन्छ । इलिअट वेभबाट नियाल्दा कम्पनीको सेयर भाउ आगामी बुलमा पाँचौ वेभ सकिदा प्रतिकित्ता ४४४ रुपैयाँसम्म पुग्न सक्ने सम्भावना रहन्छ ।  

नोटः सेयर बजारमा लगानी जोखिमपूर्ण हुन्छ । यो विश्लेषण कारोबारको लागि सिफारिस भने होइन ।