भारतीय सेयरबजारबाट पलायन हुँदै विदेशी लगानीकर्ता, एकै महिनामा बेचे भारु. ३४ हजार करोड बढीको सेयर

काठमाण्डौ । विदेशी संस्थागत लगानीकर्ता(एफआईआई)ले एक महिनाको अवधिमा भारतीय सेयर बजारबाट ३४ हजार ५७४ करोड भारु निकालेका छन् । सन् २०२५ को पहिलो दुई महिनामा भने विदेशी संस्थागत लगानीकर्ताले कुल १.१२ लाख करोड भारुबराबरको सेयर बिक्री गरेका छन् ।  

एफआईआईले जनवरी महिनामा ७८ हजार भारु बढीको सेयर बिक्री गरेका छन् । भारतीय सेयरको उच्च भ्यालुएसन र कर्पोरेट आम्दानीको वृद्धिको विषयमा देखिएको चिन्ताका कारण विदेशी संस्थागत लगानीकर्ताले भारतीय सेयर बजारबाट आफ्नो लगानी निकालिरहेको भारतीय सेयर बजारका विज्ञहरुले बताएका छन् ।  

गत डिसेम्बर महिनामा एफआईआईले भारतीय सेयर बजारबाट १५ हजार ४४६ करोड भारुबराबरको लगानी गरेका थिए ।  

गत साताको अन्तिम कारोबार दिन अर्थात शुक्रबार एफआईआर्फले उल्लेख्य मात्रामा सेयर बिक्री गरेका थिए । यस्तै उक्त दिन घरेलु लगानीकर्ता(डीआईआई)ले भने उच्च मात्रामा सेयर खरिद गरेका थिए । प्रोभिजनल डेटाका अनुसार २८ फेब्रुअरीमा एफआईआर्फले ११ हजार ६३९ करोड भारुबराबरको सेयर बिक्री गरेका थिए । उता डीआईआईले भने उक्त दिन १२ हजार ३०८.६३ करोड भारुबराबरको सेयर खरिद गरेका थिए ।  

अमेरिकी बोन्डको प्रतिफलमा आएको बढोत्तरीका कारण भारतीय बजारमा विदेशी संस्थागत लगानीकर्ताले सेयर बिक्री बढाएको जनाइएको छ । यतिबेला  अमेरिकी डलर बलियो बन्नुका साथै विश्व अर्थतन्त्रमा अनिश्चितता छाएको छ ।

जसका कारण लगानीकर्ताको ध्यान अमेरिकातर्फ बढेको छ । वित्त–वर्षको तेस्रो त्रैमासमा भारतीय कम्पनीहरुको वित्तीय अवस्थामा समेत कमजोर देखिएकाले अनिश्चितता निम्तिएको छ ।  

यस्तै भारतमा हाई भ्यालुएसनका कारण एफआईआईले चिनियाँ बजारमा लगानी बढाएका छन् ।