पाकिस्तानसँगको सम्बन्ध चिसिएसँग गर्मरायो भारतको सेयर बजार, डिफेन्स कम्पनीहरुको मूल्यमा उछाल

काठमाण्डौ । पाकिस्तानसँगको सम्बन्ध चिसिएसँगै भारतको सेयर बजार गर्मराएको छ । आज भारतको सेयर बजार मापक इन्डेक्स सेन्सेक्स र निफ्टी५० दुवै बढेका छन् ।  

सेन्सेक्स इन्डेक्स आज १.२७ प्रतिशत अर्थात १००५ अंकले बढेर ८० हजार २१८ विन्दुमा पुग्यो । यो विगत चार महिनाकै उच्च विन्दु हो ।  

यस्तै निफ्टी पनि १.२० प्रतिशत अर्थात २८९ अंकले बढेर २४ हजार ३२८ विन्दुमा पुगेको छ । आज बैंकिङ मेटल र फर्मा कम्पनीहरुको सेयरमूल्यमा राम्रो वृद्धि देखियो । यस्तै एफएमसीजी र आईटीको सेयरमा भने गिरावट देखियो ।  

सेन्सेक्सको ३० वटा कम्पनीको सेयरमा २३ वटामा हरियाली छायो भने ७ वटामा गिरावट आयो । उता निफ्टीमा पनि ५० वटा कम्पनीमध्ये ३९ वटाको सेयरमूल्य बढ्यो भने ११ वटाको घट्यो ।  

अमेरिकी राष्ट्रपति डोनाल्ड ट्रम्पको ९० दिनको अस्थायी ट्यारिफ राहातबाट भारत–अमेरिकाबीचको दुईपक्षिय व्यापार सम्झौता(बीटीए)को चर्चाले गति लिने विश्वास गरिएको छ । साथै, भारतको विपरीत चीनलाई अमेरिकाको तर्फबाट ट्यारिफमा छूट दिइएको छैन । जसका कारण भारतीय निर्यातकर्ताहरुलाई अल्पकालका लागि फाइदा हुनसक्ने अनुमान गरिएको छ । जसका कारण भारतीय लगानीकर्ताको मनोबल वृद्धि भएको छ ।  

यसका साथै विदेशी लगानीकर्ताले समेत भारतीय बजारमा खरिद बढाएका छन् । अप्रिल २१ देखि २५ सम्म भारतीय बजारमा विदेशी लगानीकर्ताले १७ हजार ४२५ करोड भारुबराबरको लगानी गरेका छन् ।  

आज भारतीय डिफेन्स कम्पनीहरुको सेयरमूल्यमा समेत उछाल आयो । आज पारस डिफेन्स,गार्डन रिच बिल्डर्स,एचएएल,भारत डाइनामिक्स जस्ता डिफेन्स कम्पनीहरुको सेयरमूल्य १० प्रतिशतलसम्मले बढे । विज्ञहरुले भारत सरकारले पाकिस्तानविरुद्ध कडा कदम चाल्न सक्ने आँकलन गरेका छन् । जसका कारण मिसाइल,ड्रोन र अन्य सैन्य उपकरणहरुको खरिद बढ्न सक्ने जनाइएको छ ।  

यही कारण डिफेन्स कम्पनीहरुको सेयरको खरिद बढेको छ । यस्तै आज भारत र फ्रान्सबीच २६ वटा राफेल विमान खरिद गर्ने सम्झौतामा हस्ताक्षर भएको छ ।