राजावादीहरुद्वारा जेठ १५ गतेदेखि अनिश्चितकालीन जनआन्दोलनको घोषणा

काठमाण्डौ । राजावादीहरूले आगामी १५ जेठदेखि अनिश्चितकालीन जनआन्दोलन गर्ने घोषणा गरेका छन् । राजसंस्था पुनर्स्थापना र सनातन हिन्दु धर्मको माग राख्दै  नेठ १५ गतेदेखि अनिश्चितकालीन जनआन्दोलन घोषणा भएको हो ।  

राजधानीमा बिहिबार पत्रकार सम्मेलन गर्दै राजसंस्था पुनःस्थापनाका लागि गठित समितिका संयोजक नवराज सुवेदीले यस्तो घोषणा गरेका हुन् । उक्त अवसरमा सुवेदीले आन्दोलन शान्तिपूर्ण हुने र भद्र अवज्ञा र सत्याग्रह आन्दोलनको स्वरुप हुने बताए ।  

आफूहरूको आन्दोलन व्यवस्था परिवर्तनका लागि भएको भन्दै उनले कुनै पनि सरकार वा सत्तामा रहेका दलहरूको विरोध नगर्ने घोषणा गरे । घोषणा सभामा समितिका संयोजक सुवेदीसहित राप्रपा अध्यक्ष राजेन्द्र लिङ्देन, राप्रपा नेपालका अध्यक्ष कमल थापालगायत उपस्थित थिए ।