छठलगत्तै सरकार बिस्तार गर्ने तयारीमा प्रधानमन्त्री

काठमाण्डौ । प्रधानमन्त्री सुशीला कार्कीले छठलगत्तै मन्त्रिपरिषद बिस्तारको तयारी गरेकी छिन् ।  

सरकारका प्रवक्ता, सूचना तथा सञ्चारमन्त्री जगदीश खरेलले मंगलबार(आज) अपरान्हदेखि रातिसम्म चलेको सरकार र राजनीतिक दलका प्रतिनिधिबीचको छलफल सकिएलगत्तै सञ्चारकर्मीसँग कुरा गर्दै यस्तो बताएका हुन् । 

उनले सरकार बिस्तारको तयारीबारे सञ्चारकर्मीले गरेको प्रश्नको जवाफ दिंदै भनेः 'सरकार बिस्तारबारे प्रधानमन्त्री ज्यूले पनि केही न केही सोचिरहनुभएको र सोअनुसारको तयारी गरिरहनुभएको जस्तो लागेको छ। सम्भवतः तिहार र छठलगत्तै बिस्तार हुन्छ।'

लामो समयदेखि सरकारमा जेनजी प्रतिनिधिहरुको सहभागिता नभएको भन्दै आलोचना भइरहेको छ । प्रधानमन्त्री कार्कीले यसअघि नै सरकार बिस्तार गर्न खोजे पनि तयार भएका केही नामहरु विवादित भएपछि होल्ड गरेकी थिइन् । अब भने विभिन्न पक्षसँग घनीभूत छलफलहरु भइसकेका कारण छठलगत्तै सरकार बिस्तारको सम्भावना देखिएको छ ।  

मन्त्रिपरिषदमा सहभागी हुने नयाँ मन्त्रीको नामहरुको विषयमा भने सरकारका प्रवक्ता खरेलले केही पनि खुलाएनन् ।