वीरगञ्ज नाकाबाट ४.६१ अर्बको खाद्यान्न आयात

काठमाण्डौ । चालु आर्थिक वर्ष २०८२/८३ को पहिलो त्रैमासमा वीरगञ्ज नाका हुँदै ४ अर्ब ६१ करोड रुपैयाँबराबरको खाद्यान्न आयात गरिएको छ । यो रकम अघिल्लो आवको सोही अवधिको तुलनामा १ अर्ब ५६ करोड बढी हो ।  

उक्त नाका हुँदै साउनदेखि असोज महिनासम्ममा धान, चामल, मकै, माल्टलगायतका १६ वटा खाद्यान्न वस्तु आयात गरिएका हुन् । गत आवको पहिलो त्रैमासमा ३ अर्ब ४ करोड रुपैयाँबराबरका १६ थरिका खाद्यान्न आयात भएको थियो ।  

चालु आवमा वीरगञ्ज नाका हुँदै सबैभन्दा बढी मकै आयात भएको छ । उक्त अवधिमा १ अर्ब ८० करोड मूल्य पर्ने ३ करोड ३६ लाख १२ हजार ८१० किलोग्राम मकै आयात भएको छ ।

गत आवमा भने १ अर्ब ९करोड मूल्यबराबरको २ करोड १६ लाख २७ हजार ९९२ किलोगाम मकै आयात भएको थियो ।  

यस्तै चालु आवको तीन महिनामा १ अर्ब ४६ करोड रुपैयाँबराबरको ३ करोड ९१ लाख एक हजार ३४२ किलोग्राम धान आयात भएको छ ।