दोश्रोपटक गरिमासँगै दौडियो काठमाण्डौ(फोटो फिचर)

काठमाण्डौ । मंसिर महिनाको चिसो ठिहीले त्यत्तिकै पनि मानिसलाई अल्छी बनाइदिन्छ । चिसोलाई कारण देखाएर बिहान सबेरै हतपत उठ्नेहरुको संख्या यो सिजनमा तुलनात्मक रुपमा घट्ने गर्छ । तर जाँगरिलाहरुका लागि यो मान्यताले काम गर्दैन । तिनै जाँगरिलाहरु काठमाण्डौबासी मंसिरको चिसोका कारण ओछ्यानबाट नउठ्दै शनिवार बिहान घोडाको गतिमा दौडिए । किशोरकिशोरीदेखि निधारमा बुढ्यौलीका रेखाहरु देखिन थालिसकेकाहरु एकाबिहानै फूर्तिलो गतिमा काठमाण्डौको सडकमा दौडिए र अल्छीहरुका लागि प्रेरणाको स्रोत बने ।  

दौडिनु स्वास्थ्यका लागि निकै राम्रो हो । यही विषय बुझेको राष्ट्रिय स्तरको गरिमा विकास बैंकले पछिल्लो समय आफूलाई जसरी वित्तीय स्वास्थ्यमा निखार्दै गइरहेको छ, उसैगरी काठमाण्डौबासीको स्वास्थ्यलाई प्राथमिकतामा राखेर फूर्तिला मान्छेहरुलाई एकाबिहानै दौडाउने व्यवस्थापन मिलायो । प्रसङ्ग हो: गरिमा विकास बैंक लिमीटेडको १९ औं वार्षिकोत्सव अवसरमा आयोजित ‘दोश्रो गरिमा रोड रेस २०८२’ को । 

‘स्वास्थ्यका लागि खेलकूद’ भन्ने नारासहित गरिमाले आफ्नो सिग्नेचर प्रोग्रामको रुपमा गत वर्षदेखि रोड रेसको सुरुवात गरेको थियो । २०८१ सालमा काठमाण्डौ दौडाएको गरिमाले २०८२ सालमा पनि सो कार्यक्रमलाई निरन्तरता दियो । रोड रेसको दोश्रो संस्करण भएका कारण होला कार्यक्रम गत वर्षभन्दा निकै धेरै व्यवस्थित र उत्साहपूर्ण देखियो ।  

विभिन्न क्याटेगोरीको समूहमा दौडिन नाम टिपाउनेहरुको लाइन लागेको यो वर्ष चिसो ठिहीलाई चुनौति दिंदै दौडिनेहरुको संख्या १४०० भन्दा माथि रह्यो ।  

बैंकले यो पटक ‘भेटेरान’ नामको नयाँ क्याटेगोरी पनि थपेको थियो । यसमा ४५ वर्षभन्दा माथिका महिला र ५० वर्ष माथिका पुरुषबीच प्रतिस्पर्धा चलेको थियो । यो समूहमा पनि सहभागिता उत्साहजनक नै रह्यो । गरिमासँगै काठमाण्डौलाई जगाउन पुट्ट पेट भएकाहरु समेत असिनपसिन हुँदै दौडिएका दृश्य निकै रमाइलो देखिएको थियो ।  

यसबाहेक यो पटक गरिमाले गत वर्षजस्तै कर्पोरेट समूह र खुल्ला समूहअन्तर्गतका रेस गराएको थियो ।  

खुल्लातर्फका सहभागीका लागि १० किलोमिटरको दूरी तोकिएको थियो भने कर्पोरेट र भेटेरानतर्फ ५ किलोमिटरको दूरी तोकिएको थियो ।  

गरिमा विकास बैंकको काठमाण्डौ महानगरपालिका वडानम्बर ३, बालुवाटार क्षेत्रमा रहेको प्रस्तावित केन्द्रीय कार्यालय भवनबाट दौड सुरु गरिएको थियो । 

तीनवटै समूहका पहिलो, दोश्रो, तेश्रो, चौथो र पाँचौ हुने धावकलाई नगद पुरस्कारको व्यवस्था गरिएको थियो । विजेताहरुलाई पुरस्कारको रुपमा गरिमाले कुल २ लाख ७२ हजार रुपैयाँ नगद खर्च गरेको छ । सबैभन्दा बढी खुल्लातर्फको विजेताहरुले पुरस्कार पाएका छन् । खुल्लातर्फका प्रथम, दोश्रो, तेश्रो, चौथो र पाँचौ हुनेले क्रमशः ५० हजार, ३५ हजार, २० हजार, १५ हजार र १० हजार नगद पुरस्कार पाएका थिए ।  

यस्तै भेटेरान र कर्पोरेट समूहका पहिलो, दोश्रो, तेश्रो, चौथो र पाँचौ हुनेले क्रमशः ३० हजार, २० हजार, १४ हजार १० हजार र ७ हजार नगद पुरस्कार प्राप्त गरेका थिए ।  

गरिमा विकास बैंकका प्रमुख कार्यकारी अधिकृत माधवप्रसाद उपाध्यायले रोड रेसको दोश्रो संस्करणको सहभागिता गत वर्षभन्दा उत्साहपूर्ण रहेको बताए । उनकाअनुसार सबै समूहमा गरी ४ हजार बढीले नाम दर्ता गराएका थिए । गरिमाले जनसरोकारका यस्तै महत्वपूर्ण विषयमा विभिन्न क्षेत्र र वर्गसँग मिलेर निरन्तर सहकार्य पनि गरिरहेको उनको भनाई छ । उनले दोश्रो संस्करणमा दौडिन आउनेहरुलाई अझ तेज गतिको धावक बनेर अर्को वर्ष पनि आउन अहिल्यै निम्ता गरे ।  

आफूहरुले स्वास्थ्यका लागि खेलकूद जरुरी रहेको सन्देशसहित रोड रेस सुरु गरेको र आगामी वर्ष यसलाई अझ वृहत र व्यवस्थित गर्दै लगिने गरिमा विकास बैंकका नायव प्रमुख कार्यकारी अधिकृत अनिल रेग्मीले जानकारी दिए । 'जसरी एउटा वित्तीय संस्था बलियो बन्नका लागि उसको वित्तीय स्वास्थ्य मजबुत हुन जरुरी छ, उसैगरी एउटा व्यक्ति बलियो बन्नका लागि स्वास्थ्य राम्रो हुन आवश्यक छ ।' रेग्मीले भने -'यही थिमअन्तर्गत रहेर हामीले स्वस्थ समाज निर्माणमा थोरै पनि सहयोग होस् भनेर यो कार्यक्रमलाई निरन्तरता दिएका हौं ।'