भीषण पहिरो झरेको सुनचाँदी बजार सम्हालियो, १२ घण्टामै बाउन्सब्याक

काठमाण्डौ । जसरी खसेको थियो, त्यसैगरी बाउन्सब्याक हुँदै सुनको भाउ अन्तर्राष्ट्रिय बजारमा पुनः उकालो लाग्न थालेको छ । केही घण्टाअघिसम्म तीव्र गिरावट देखिएको सुनचाँदीको मूल्य अहिले सम्हालिँदै सकारात्मक दिशातर्फ फर्किएको छ ।

अन्तर्राष्ट्रिय बजारअनुसार सुनको मूल्य प्रति औंस ४,७२० डलर नजिक पुगेको छ, जुन करिब २.५५ प्रतिशतले बढेको हो । त्यस्तै चाँदीको मूल्य पनि उकालो लाग्दै प्रति औंस ७३.८८ डलर आसपास पुगेको छ, जसमा करिब ३.७ प्रतिशतको वृद्धि देखिएको छ ।

यसअघि करिब १२ घण्टाअघि बजारमा सुनचाँदीको मूल्यमा भीषण गिरावट आएको थियो । लगानीकर्ताबीच बेचैनी बढेको अवस्थामा बजारमा ‘सेल अफ’ देखिएको थियो । तर पछिल्लो अपडेटले भने बजारमा सुधार देखिएको छ र मूल्य पुनः उकालो लाग्न थालेपछि लगानीकर्ताले केही राहत महसुस गरेका छन् ।

विज्ञहरूका अनुसार छोटो अवधिको तीव्र गिरावटपछि बजारमा ‘टेक्निकल बाउन्स’ देखिएको हुन सक्छ । साथै, अन्तर्राष्ट्रिय आर्थिक संकेतहरू, मुद्रास्फीति र डलरको उतारचढावले पनि सुनचाँदीको मूल्यमा प्रत्यक्ष प्रभाव पारिरहेको छ ।

बजार विश्लेषकहरू भने अझै सतर्क रहन सुझाव दिइरहेका छन् । उनीहरूका अनुसार यस्तो उतारचढावको अवस्था केही समय कायम रहन सक्ने भएकाले लगानी गर्दा सावधानी अपनाउन आवश्यक छ ।