सेयर कारोबार अब सोमबारदेखि शुक्रबारसम्म, यो साता चाहिँ के हुन्छ ?

काठमाण्डौ । सरकारले शनिवार र आइतबार विदा दिने निर्णय गरेपछि त्यसलाई कार्यान्वयनमा लैजाँदै नेपाल स्टक एक्सचेञ्ज लिमीटेड-नेप्से)ले पनि सोमबारदेखि शुक्रबारसम्म सेयर कारोबार हुने सूचना सार्वजनिक गरेको छ । 

नेप्सेको सुपरीवेक्षण शाखाले बुधबार एक सूचना प्रकाशित गर्दै साताको शनिवार र आइतबार दुई दिन सार्वजनिक विदा दिने निर्णय सरकारबाट भएका कारण सोही अनुरुप नेप्सेको चैत २२ गते बसेको सञ्चालक समितिको बैठकले सोमबारदेखि शुक्रबारसम्म साबिककै समयमा सेयर कारोबार सञ्चालन गर्ने निर्णय गरेको स्पष्ट पारेको छ । 

नेप्सेको यो आधिकारिक सूचनासँगै अब प्रत्येक साताको शनिवार र आइतबार सार्वजनिक विदा हुने भएका कारण बजार बन्द हुनेछ भने साबिकको समय अर्थात बिहान ११ बजेदेखि दिउँसो ३ बजेसम्म प्रत्येक साता सोमबारदेखि शुक्रबारसम्म सेयर कारोबार सञ्चालन हुनेछ ।  

यो साताको सेयर कारोबारको सुरुवात आइतबारदेखि भएको थियो । नयाँ निर्णय यही साताबाट लागू हुन्छ कि अर्को साताबाट मात्र ? भन्ने प्रश्नमा नेप्सेका प्रवक्ता मुराहरि पराजुलीले जारी साताको आउने शुक्रबार समेत सेयर कारोबार हुने प्रष्ट पारे ।