सेवाग्राहीको घरमै राहदानी पुर्याउने सेवा सुरु

काठमाण्डौ । मकवानपुर जिल्ला प्रशासन कार्यालयले हुलाक सेवामार्फत राहदानी सिधै सेवाग्राहीको घरमै पुर्याउने सेवा सुरु गरेको छ ।  

योसँगै अब हेटौंडामा बसोबास गर्ने सेवाग्राहीहरूले राहदानी लिन जिल्ला प्रशासन कार्यालय धाउनु पर्ने झन्झटबाट मुक्ति पाएका छन् ।  

आज हुलाक कार्यालय मकवानपुरले हेटौंडा उपमहानगरपालिका–४ स्थित कपुर कम्प्लेक्स नजिक बस्ने २२ वर्षीय निश्चल मानन्धरको घरमै पुगेर राहदानी हस्तान्तरण गरेको हो । उक्त कार्यका लागि हलकारा, हुलाक कार्यालयका प्रमुख तथा जिल्ला प्रशासन कार्यालयका कर्मचारीसमेत उपस्थित भएका थिए ।

जिल्ला प्रशासन कार्यालयले पहिलो चरणमा ५० वटा राहदानी हुलाकमार्फत वितरणका लागि पठाएको छ, जसलाई आजै सबै सेवाग्राहीका घरमा पु¥याउने लक्ष्य राखिएको जनाइएको छ ।  

सरकारले सर्वसाधारणलाई घरमै सेवा उपलब्ध गराउने उद्देश्यअनुसार जिल्ला प्रशासन कार्यालय हेटौंडाको समन्वयमा यो कार्यक्रम सुरु गरिएको हो । यसले सेवाग्राहीको समय र श्रम दुवै बचत गर्नुका साथै राहदानी वितरणलाई अझ प्रभावकारी बनाउने अपेक्षा गरिएको छ ।