वीरगन्ज नाका हुँदै आयात वृद्धि, राजश्व संकलन १.७७ खर्ब

काठमाण्डौ । पर्साको वीरगन्ज नाका हुँदै चालु आर्थिक वर्षको पहिलो नौ महिनामा वस्तु तथा सामान आयात बढेको छ। वीरगन्ज भन्सार कार्यालयका अनुसार समीक्षा अवधिमा रु. ६ खर्ब ९४ अर्ब ५ करोडबराबरको आयात भएको छ, जुन गत आर्थिक वर्षको सोही अवधिको तुलनामा १३ प्रतिशतले बढी हो। गत वर्ष सोही अवधिमा रु. ६ खर्ब १३ अर्ब ६१ करोडको आयात भएको थियो।

आयात संरचनालाई हेर्दा पेट्रोलियम पदार्थ शीर्ष स्थानमा रहेको छ। चालु आवमा मात्र रु. १ खर्ब ४८ अर्बभन्दा बढीको पेट्रोलियम पदार्थ आयात भएको छ। गत आवको सोही अवधिमा भने एक खर्ब ४० अर्ब १० करोड रुपैयाँको पेट्रोलियम पदार्थको आयात भएको थियो । यस्तै, फलाम तथा फलामजन्य सामग्री, भटमासको कच्चा तेल, मेसिनरी तथा पार्टपुर्जा र इलेक्ट्रिक उपकरणको आयात पनि बढेको छ।

नौ महिनामा ६२ अर्ब २६ करोड रुपैयाँ पर्ने फलाम तथा फलामबाट बनेका सामान आयात भएको छ । यस्तै ५० अर्ब ४० करोड रुपैयाँको  भटमासको कच्चा तेल, ४९ अर्ब १३ करोड रुपैयाँ पर्ने मेसिनरी तथा पार्टपुर्जा र ३४ अर्ब १९ करोड रुपैयाँ पर्ने इलेक्ट्रिक मेसिनरी उपकरण र तिनका पार्टपुर्जा आयात भएको छ ।      

अर्कोतर्फ, आयातसँगै राजस्व संकलन पनि सन्तोषजनक देखिएको छ। चालु आवको नौ महिनामा भन्सार कार्यालयले रु. १ खर्ब ७७ अर्ब ६६ करोड राजस्व उठाएको छ ।