(1).gif)
(2).gif)
.png)
काठमाण्डौं । बाजुरा र हुम्लालाई जोड्ने महत्वपूर्ण सडक सञ्जाल कर्णाली करिडोरमा देखिएको तनावपछि दुई दिनदेखि अवरुद्ध भएको यातायात सेवा पुनः सञ्चालनमा आएको छ ।
सर्वपक्षीय छलफलमार्फत ६ बुँदे सहमति भएपछि शुक्रबार दिउँसोदेखि करिडोर खुलाइएको हो ।
(2).gif)
.gif)
हिमाली गाउँपालिका–६ धुलाचौर क्षेत्रमा उत्पन्न विवाद, कुटपिट र त्यसपछि चर्किएको आन्दोलनका कारण बिहीबार बिहानदेखि कर्णाली करिडोर पूर्ण रूपमा बन्द गरिएको थियो ।
सडक बन्द भएपछि बाजुरा र हुम्लाबीचको आवतजावत ठप्प बनेको थियो भने दैनिक उपभोग्य वस्तुको ढुवानी, यात्रु सेवा र स्थानीय जनजीवनसमेत प्रभावित बनेको थियो ।
स्थानीय बासिन्दाले घटनामा संलग्नमाथि कारबाही, घाइतेको उपचार, लुटिएको सामानको क्षतिपूर्ति तथा सुरक्षाको ग्यारेन्टीको माग गर्दै आन्दोलन शुरु गरेका थिए ।
आन्दोलनका कारण करिडोर क्षेत्रमा तनावपूर्ण अवस्था सिर्जना भएको थियो ।
बढ्दो तनावलाई नियन्त्रणमा लिन स्थानीय प्रशासन, सुरक्षा निकाय, राजनीतिक दल, जनप्रतिनिधि तथा आन्दोलनरत पक्षबीच लामो समय छलफल भएको थियो ।
अन्ततः शुक्रबार ६ बुँदे सहमतिमा हस्ताक्षर भएपछि आन्दोलन स्थगित गर्दै करिडोर सञ्चालनमा ल्याइएको हो ।
सहमतिको पहिलो बुँदाअनुसार हिमाली गाउँपालिका–३ लाम्पाटामा भएको घटनाको स्थलगत अनुगमन गरिनेछ ।
साथै, घटनासम्बन्धी सर्जिमिन मुचुल्का तयार पारेर थप अनुसन्धान प्रक्रिया अघि बढाइनेछ ।
यस्तै, घटनामा संलग्न रहेको आरोप लागेका खर्पुनाथ गाउँपालिका–२ र ३ का व्यक्तिहरूसहित जो–कोही दोषी देखिए कानूनी दायरामा ल्याइने सहमति भएको छ ।
स्थानीयका अनुसार घटनाका क्रममा केही स्थानीय बासिन्दा तथा घुम्न गएका पर्यटकमाथि आक्रमण हुनुका साथै सामानसमेत लुटिएको थियो ।
सहमतिपत्रमा पीडितको लुटिएको सामानको क्षतिपूर्ति उपलब्ध गराउने उल्लेख गरिएको छ ।
(2).gif)
कुटपिटबाट घाइते भएका व्यक्तिहरूको उपचार खर्च व्यवस्थापन गर्ने, विस्थापित परिवारलाई पुनःस्थापित गर्ने तथा उनीहरूको सुरक्षाको प्रत्याभूति दिलाउने सहमति पनि भएको छ ।
स्थानीयले सुरक्षाको ग्यारेन्टी नभएसम्म आफूहरू असुरक्षित महसुस गरिरहेको बताएका थिए ।
त्यस्तै, हिमाली–३ च्याचौरमा निर्माणाधीन प्रहरी चौकीमा तोडफोड तथा क्षति पुर्याइएको सामग्रीको क्षतिपूर्ति असुल गर्ने र प्रहरी चौकी भवन निर्माणको काम तत्काल पुनः शुरु गर्ने सहमति पनि भएको छ ।
स्थानीय प्रशासनले यस घटनाले सुरक्षा संरचनामाथि समेत असर पारेको स्वीकार गरेको छ ।
सहमति कार्यान्वयनका विषयमा आन्दोलनरत पक्षले सरकार र प्रशासनलाई स्पष्ट चेतावनी दिएका छन् ।
उनीहरूले २४ घण्टाभित्र सहमति कार्यान्वयन प्रक्रिया शुरु हुनुपर्ने माग राख्दै त्यसो नभए पुनः अनिश्चितकालीन आन्दोलनमा उत्रिने बताएका छन् ।
सहमतिपत्रमा आन्दोलनरत पक्षका तर्फबाट हिमाली युवा क्लबका अध्यक्ष विनोद बुढा, नेपाल प्रहरीका प्रहरी निरीक्षक लक्ष्मीराज जोशी, सशस्त्र प्रहरी निरीक्षक प्रदीप रावत तथा जिल्ला प्रशासन कार्यालयका प्रतिनिधिले हस्ताक्षर गरेका छन् ।
राजनीतिक दलका तर्फबाट राष्ट्रिय स्वतन्त्र पार्टीका सचिव अशोक पाण्डे, नेपाली कांग्रेसका सभापति अम्मलाल कार्की तथा नेकपा (एमाले) का पूर्व जिल्ला कमिटी सदस्य बिर्ख भण्डारीले सहमतिपत्रमा हस्ताक्षर गरेका छन् ।
यस्तै, गाउँपालिका अध्यक्ष गोविन्दबहादुर मल्ल, वडा नं. ६ का अध्यक्ष प्रेमलाल भण्डारी तथा वडा नं.४ का अध्यक्ष भीमानन्द पाण्डेसहित स्थानीय जनप्रतिनिधिहरूले पनि सहमतिमा प्रतिबद्धता जनाएका छन् ।
स्थानीयले अब सहमति व्यवहारमै कार्यान्वयन भए मात्रै क्षेत्रको अवस्था सामान्य बन्ने बताएका छन् ।
.gif)
.gif)
(1).gif)
(2).gif)
.png)
